GünAzTv: Dağlıq Qarabağda mayın 23-də keçirilən “parlament seçkisi”ni tanınmayan “respublikanın” rəhbərliyi baş tutmuş sayır. Erməni mənbələrinin xəbərlərinə görə, seçkidə 4 partiya mübarizə aparıb. Onlardan ikisi formal olaraq iqtidar, ikisi isə müxalifət hesab olunur. Lakin Dağlıq Qarabağda separatçıların qurduğu bütün institutlar kimi siyasi partiyalar da oyuncaqdır və müstəqil müşahidəçilər Azərbaycanın işğal altında olan bu bölgəsində real siyasi mübarizənin mümkün olmadığını qeyd edir.

GünAzTv mətbuat mərkəzinin "Musavat"-a istinadən yaydığı məlumata görə, Seçici siyahısında 93 min adamın adı göstərilsə də bu rəqəm də saxtadır. Çünki Dağlıq Qarabağda mülki əhali azdır və “seçici” kimi göstərilənlərin əksəriyyəti Ermənistanın və separatçıların bölgəyə nəzarət edən hərbçiləridir. Xəbərlərə görə, “seçkilərə” qatılan namizədlərin əksəriyyəti Dağlıq Qarabağın, müstəqilliyini müdafiə edir. Az sayda siyasətçi Qarabağın ümumiyyətlə, Ermənistana birləşdirilməsini istəyir. Seçki komissiyasının sədri bildirib ki, hələ nəticələr bəlli deyil.Beynəlxalq qurumlar isə bu “seçkiləri” tanınmadığını bəyan etməkdədir. Avropa Birliyinin xarici əlaqələr üzrə yüksək səlahiyyətli nümayəndəsi Ketrin Eştonun mayın 23-də yaydığı bəyanatda bu seçkinin qanunsuz olduğu və parlament seçkisinin tanınmayacağı bildirilir. Ketrin Eşton tərəfləri Qarabağ münaqişəsinin sülh yolu ilə həlli istiqamətində göstərilən səyləri ikiqat artırmağa çağırıb. Rəsmi Bakı bundan əvvəl Azərbaycanın işğal edilmiş ərazilərində belə bir seçkinin beynəlxalq hüquq normaları, münaqişənin həlli ilə bağlı BMT-nin qətnamələri və ATƏT-in prinsiplərinə zidd olduğunu bəyan edib. Dağlıq Qarabağın Azərbaycan icması da yaydığı bəyanatda bildirir ki, bu seçki Azərbaycan Konstitusiyasını, beynəlxalq hüququn norma və prinsiplərini kobud şəkildə pozur və Dağlıq Qarabağın azərbaycanlı icması üzvlərinin seçki hüquqlarını nəzərə almır.İcma bəyan edir ki, Azərbaycanın Dağlıq Qarabağ bölgəsində legitim seçkilər yalnız Ermənistan qoşunlarının işğal olunmuş ərazilərdən çıxarılmasından, oradan qovulmuş azərbaycanlı əhalinin öz doğma torpaqlarına qayıtmasından, bölgənin azərbaycanlı və erməni icmaları arasında dinc yaşayışın təmin olunmasından sonra keçirilə bilər. Bəyanatda deyilir ki, Ermənistan beynəlxalq hüquq normalarına, BMT-nin Nizamnaməsinə zidd olaraq və Dağlıq Qarabağ münaqişəsi ilə bağlı beynəlxalq təşkilatların qərarlarını inkar edərək artıq neçənci dəfədir ki, Azərbaycanın işğal altındakı ərazilərində belə "seçkilər" təşkil edir: "Ermənistan öz qanunsuz hərəkətləri ilə Dağlıq Qarabağ münaqişəsinin nizamlanması yolunda ATƏT-in Minsk Qrupu çərçivəsində aparılan sülh danışıqlarına, beynəlxalq birliyin regionda sülh və əməkdaşlıq yaratmaq təşəbbüslərinə və icmalar arasındakı dialoq imkanlarına köklü zərbə vurur". Dağlıq Qarabağ bölgəsinin azərbaycanlı icması ümidvar olduğunu bildirir ki, Ermənistanın qeyri-konstruktiv hərəkətləri beynəlxalq birlik tərəfindən kəskin şəkildə qınanılacaq, bu ölkənin işğalçı siyasətinə son qoyulması üçün ən təsirli tədbirlər görüləcək. Rusiya da separatçı rejimin keçirdiyi “seçkiləri” tanımayacağını bəyan edib. “Rəsmi Moskva Azərbaycanın ərazi bütövlüyü prinsipini dəstəkləyir və Dağlıq Qarabağı müstəqil bir dövlət kimi tanımır”. Bu bəyanatla Azərbaycanın işğal olunmuş ərazisi olan Dağlıq Qarabağda erməni separatçıları tərəfindən 23 may tarixində keçirilən “parlament seçkisi”ni şərh edən Rusiya Xarici İşlər Nazirliyinin rəsmi nümayəndəsi Andrey Nesterenko çıxış edib. “Moskva Azərbaycanın ərazi bütövlüyü prinsipini beynəlxalq hüququn digər əsas norma və prinsiplərinə bərabər səviyyədə dəstəkləyir. Məlum olduğu kimi, biz Dağlıq Qarabağı müstəqil bir dövlət kimi tanımırıq. Bizim qənaətimizcə, onun gələcək statusu güc tətbiq edilmədən Minsk prosesi çərçivəsində bütün tərəflər arasında siyasi danışıqlar nəticəsində müəyyən edilməlidir” deyə, Nesterenko bildirib. Nesterenkonun sözlərinə görə, Moskvada münaqişənin sülh yolu ilə nizamlanması prosesinin gedişinin Dağlıq Qarabağda “seçkilər”in keçirilməsindən asılı olmadığını hesab edirlər. O qeyd edib ki, Rusiya ATƏT-in Minsk Qrupundakı digər həmsədr tərəfdaşları ilə sıx qarşılıqlı əlaqədə olacaq və gələcəkdə də tərəflərə Qarabağ düyününün kompromis şəkildə açılmasında ciddi-cəhdlə köməklik edəcək.“Seçkilərin” beynəlxalq ictimaiyyət tərəfindən tanınmayacağını İrəvan və Xankəndində də bilirlər. Separatçı erməni rejimi və Ermənistan hesab edir ki, Dağlıq Qarabağda “demokratik seçkilər” keçirməklə onun nəticələrinin legitimliyinin tanınması asanlaşacaq. Bu baxımdan ermənilər əsas təbliğatı Dağlıq Qarabağda “seçkilərin” necə demokratik keçməsi üzərində qurublar.