GünAzTv: ABŞ (Amerika Birləşmiş Ştatları) Konqresinin Demokrat partiyasından olan üzvləri Tim Ualz və Betti Makkolum Ermənistanın və erməni diasporunun müraciəti əsasında İraqda yaşayan ermənilərin Ermənistana köçürülməsi ilə bağlı dövlət katibi Hillari Klintona məktub ünvanlayıblar. ABŞ konqresmenləri Hillari Klintona İraqda yaşayan ermənilərin Ermənistana köçürülməsi üçün fond yaratmağı təklif edirlər. Onların qənaətinə görə, İraq erməniləri məhz xristian olduqları üçün bu ölkədə təzyiqlərə məruz qalırlar. Bu barədə "Azadlıq" radiosunun erməni redaksiyası məlumat yayıb.Ancaq erməni diasporu ilə bağlı olan informasiya portallarında İraqda yaşayan ermənilərin Ermənistana deyil, bu ölkənin işğalı altında olan Dağlıq Qarabağ ərazisinə köçürülməsindən söhbət açılır. ABŞ konqresmenlərinin Hillari Klintona müraciətində isə bildirilir ki, Ermənistan erməni "qaçqınlar"ının məskunlaşdırılması üçün bütün mümkün addımları atmağa hazır olduğunu bəyan edib: "İraqda yaşayan ermənilərin yeni və təhlükəsiz həyata başlamaq imkanı qazanması Birləşmiş Ştatların da maraqlarına uyğundur".ABŞ dövlət katibinə mayın 14-də ünvanlanan müraciəti 5 konqresmen imzalayıb. Respublikaçı konqresmen Kolin Piterson müraciəti imzalamasa da təşəbbüsün tərafdarı olduğunu bildirib.Konqresmenlərin müraciətində deyilir: "Biz Obama adminstrasiyasını Suriya və İordaniyada məskunlaşmış xristian ermənilərin Ermənistana köçürülməsi üçün BMT-nin Qaçqınlarla iş üzrə Ali Komissarının fondundan vəsait ayırmağa çağırırıq. ...ABŞ 2011-ci ilin sonunadək öz qoşunlarını İraqdan çıxarmağı planlaşdırır. Amma bununla yanaşı İraq qaçqınlarına beynəlxalq yardımlar da getdikcə azaldılır, İraq xristianlarına qarşı zorakılıq halları isə artmaqda davam edir. İraq qaçqınlarının vəziyyəti istər ölkənin sərhədləri çərçivəsində, istərsə də ondan kənarda gündən-günə ağırlaşmaqdadır".Konqresmenlər öz məktublarında ABŞ Dövlət Departamentinin 2008-ci ildə BMT Baş Komissarının Ermənistandakı ofisinə 1 milyon dollar vəsait ayırdığını, bunun nəticəsində İraqdan olan mindən artıq erməninin Ermənistana köçürüldüyünü də xatırladırlar. Məktub müəlliflərinin qənaətinə görə, eyni məqsədlə yeni vəsaitlərin ayrılması "regional problemlərin həllinə effektiv təsir göstərəcək".Qeyd edək ki, Ermənistanın miqrasiya xidmətinin rəhbəri Qaqik Yeqanyan "Azadlıq" radiosunun erməni dilində redaksiyasın açıqlamasında ölkəyə İraqdan min nəfərdən artıq erməninin köçürüldüyü barədə məlumatı təsdiqləyib.İraq ermənilərinin milli idarəetmə mərkəzinin sədri Paruyr Akopyan "Azadlıq" radiosuna açıqlamasında bildirib ki, ermənilər Ermənistana deyil, ABŞ-a köçmək istəyirlər və onların sayı 2 min nəfərdən çoxdur: "Düzdür, Ermənistan bir çox məsələlərdə İraq ermənilərinə yardım göstərir. Hətta onların bəzilərini mənzillə də təmin edib. Ancaq Ermənistanda əmək haqqı həddən artıq aşağı olduğu üçün ora köçən İraq erməniləri öz ailələrini dolandıra bilməyəcəklər. Hətta Ermənistanın öz vətəndaşları da Avropaya və ABŞ-a köçmək istəyirlər. Bu bədbəxtlikdir, amma nə etmək olar, rallıq belədir".Erməni mənbələri isə 2008-ci ilədək İraqdan köçürülən ermənilərdən yalnız 59 nəfərinin Ermənistan ərazisində məskunlaşdırıldığını yazırlar. Digərləri isə işğal altında olan Dağlıq Qarabağın ayrı-ayrı bölgələrinə köçürülüblər. Xalq cəbhəsi