GünAzTv: Ermənistanda eks-prezident Robert Köçəryanın indiki prezident Serj Sərkisyanı devirərək hakimiyyətə qayıtmaq yönündə fəaliyyətlərini gücləndirdiyi haqda yeni xəbərlər gəlir. Xatırladaq ki, erməni mənbələri Köçəryanın mayın 8-də Şuşanın işğal olunmasını qeyd etmək üçün Dağlıq Qarabağda olarkən separatçı rejimin nəzarətindəki silahlı qüvvələrin komandirləri ilə Sərkisyanın devrilməsi planını müzakirə etdiyi haqda xəbərlər yaymışdılar. Bildirilir ki, Dağlıq Qarabağın keçmiş “müdafiə naziri” Samvel Babayan Köçəryanın əsas müttəfiqlərindən biridir. Köçəryan Sərkisyanı devirmək üçün Dağlıq Qarabağda ona sadiq qüvvələri İrəvana yeridə bilər.

1998-ci ildə Köçəryan o vaxtkı prezident Levon Ter-Petrosyanı istefaya məcbur etmək üçün məhz bu taktikadan istifadə etmişdi.Yeni məlumatlara görə, Köçəryan hakimiyyətə qayıtmaq planlarını İranla razılaşdırır. Məlum olub ki, bu günlərdə Samvel Babayan Tehranda gizli  səfərdə olub. Bu barədə məlumat mətbuatda yayıldıqdan sonra İrana getdiyini təsdiqləyən Babayan deyib ki, o, Ermənistanın daxili siyasətinə dair heç kimlə müzakirə aparmayıb. Bildirilir ki,  Babayanın ofisi mətbuatda onun  Köçəryanın yenidən hakimiyyətə qayıtmasına İranın dəstəyini müzakirə etmək üçün Tehrana getdiyi haqda yayılan xəbərləri təkzib edir. Buna baxmayaraq, Babayanın Tehranda kimlərlə görüşdüyü və hansı məqsədlə ora getdiyi də göstərilmir. Mətbuat isə iddia edir ki, Babayan İranın xüsusi xidmət və təhlükəsizlik strukturlarının rəhbərləri ilə görüşüb. Məlumatlara görə, Köçəryan vəd edib ki, hakimiyyət başına qayıtsa Babayana Ermənistanın müdafiə naziri postunu verəcək.Ermənistan mətbuatı xatırladır ki, bu ilin yanvar ayında Köçəryan da Tehranda səfərdə olub və prezident Mahmud Əhmədinejad, xarici işlər naziri Manuçehr Möttəki tərəfindən qəbul edilib. İran tərəfi bəyan edib ki, Köçəryanla “köhnə dost” kimi keçmiş haqda “xoş xatirələr” və gələcək barədə “perspektivlər” müzakirə olunub. Babayan və Köçəryan hər ikisi Dağlıq Qarabağdandır. Babayan 1993-1999-cu illərdə separatçı rejimin silahlı qüvvələrinin “komandanı” olub və Dağlıq Qarabağda ən nüfuzlu şəxs hesab edilirdi. Daha sonra o, Dağlıq Qarabağda “prezident” Arkadi Qukasyanı devirmək cəhdinə görə həbs edilib. Babayanın Ermənistan prezidenti Serj Sərkisyan və indiki müdafiə naziri Seyran Ohanyanla münasibətləri olduqca pisdir. Onun həbsdən buraxılaraq Ermənistana qayıtmasını isə Robert Köçəryan səlahiyyət müddətinin başa çatmasına az qalmış təmin edib. Bildirilir ki, Dağlıq Qarabağdakı erməni qüvvələrinin bir hissəsi hələ də Babayanın təsiri altındadır.Bəs nədən Köçəryan yenidən hakimiyyət planlarını İranla müzakirə edir və Tehrandan dəstək almağa çalışır? Tehranın Sərkisyanın hakimiyyətdən devrilməsində hansı maraqları ola bilər? Erməni mənbələrində yer alan məlumatlara əsasən belə qənaətə gəlmək olar ki, Köçəryan hakimiyyətə qayıtmaq üçün Qarabağ kartından istifadə etmək niyyətindədir. İran isə Sərkisyanın Dağlıq Qarabağ ətrafındakı rayonların Azərbaycana qaytarılması planına prinsipcə razı olmasından narahatdır. Belə məlumatlar var ki, İranla həmsərhəd olan Cəbrayıl, Füzuli və Zəngilan rayonlarının qaytarılmasına dair danışıqlar Tehranda narahatlıqla izlənilir. İran ehtiyat edir ki, həmin rayonlarda sülhməramlılar adı altında xarici hərbi qüvvələr yerləşəcək. İranın İrəvandakı səfiri də bu yaxınlarda bəyan etmişdi ki, Dağlıq Qarabağla birbaşa sərhəddə malik olan yeganə ölkə kimi İran aparılan danışıqları diqqətlə izləyir, həmçinin bu bölgədə xarici sülhməramlı qüvvələrin yerləşdirilməsinə dair İranın öz mövqeyi var. Belə məlumatlar da var ki, ABŞ da Dağlıq Qarabağ separatçıları ilə təmaslar zamanı İranla sərhəd rayonların qaytarılmasını ayrıca müzakirə edib. İstisna deyil ki, Köçəryan hakimiyyətə qayıtmasına İranın dəstəyinin əvəzində Qarabağ danışıqlarında və ətraf rayonların qaytarılması məsələsində Tehranın şərtlərini nəzərə almağı vəd edir. İran Rusiyadan sonra Ermənistana güclü təsir imkanlarına malik ikinci ölkədir. Ermənistan mənbələrinin məlumatlarına inansaq, Kreml Köçəryanın yenidən hakimiyyətə qayıtmasına dəstək verməyib.Lakin istənilən halda, Ermənistanın qarışması və əsas siyasi qüvvələrin bir-birinə qarşı savaşa başlaması Azərbaycanın xeyrinədir. Hazırda Qərbin Türkiyəyə təzyiq edərək, onu Ermənistanla sərhədlərini açmağa təhrik etməsi fonunda İrəvan qarışsa, belə bir prosesin təxirə salınacağı şübhəsizdir. Bu vəziyyət həm də erməniləri daha da zəiflədər, Dağlıq Qarabağ və Ermənistan erməniləri arasında olan konflikti geridönməz halda dərinləşdirərdi. musavat