GünAz TV: Politoloq bildirib ki, “Azərbaycan indiki situasiyada özünü qorumaq üçün təmkinli siyasət yürütməli, təxribatlara uymamalıdır”.

 “Azərbaycanın vəziyyəti çox gərgindir. Faktiki olaraq Rusiya və İranın əlində qalıb. Onu da unutmaq olmaz ki, Rusiya bir çox məsələlərdə İranın müttəfiqidir. Bu səbəbdən İranın Azərbaycana təzyiqlərinin arxasında həm də Rusiya dayanır. Üstəlik, Ermənistan Rusiyanın istəklərinə uyğun olaraq Azərbaycana təhdidlərini davam etdirir”.

Politoloq Vəfa Quluzadə bunları Azərbaycanın həm cənub, həm də şimal qonşuları tərəfindən aşkar təhdidlərə tuş gəlməsini şərh edərkən bildirdi. İranın davamlı təzyiqləri ilə üzləşən, onun təhdidlərinə məruz qalan ölkəmizə indi də şimaldan təhdidlər yönəlib. Dünənki sayımızda yazdığımız kimi, Rusiya Azərbaycan sərhədlərinə qoşun yığmağa başlayıb.

Belə vəziyyətdə nə etməli olduğumuza gəldikdə, V.Quluzadə deyir ki, Azərbaycan indiki situasiyada (moqeiyyət) özünü qorumaq üçün sakit, təmkinli siyasət yürütməli, təxribatlara uymamalıdır: “Çünki Azərbaycanın nə İranı, nə də Rusiyanı məğlub etmək imkanı yoxdur. Rəsmi Bakı aktiv surətdə bu cür planları dünya qarşısında ifşa etməlidir. O halda Rusiya və İranın planları heçə enər. Azərbaycan gərək vəziyyətlə bağlı yaxın müttəfiqi Türkiyə ilə davamlı şəkildə müzakirələrə başlasın. Strateji Əməkdaşlıq Şurasının iclası çağırılsın və vəziyyət ətraflı müzakirə edilsin. Həmçinin gərəkdir ki, Azərbaycanın müdafiə naziri Amerikaya getsin, İrana yox. NATO-nun qərargahına gedib indiki vəziyyətin gərginliyini izah etsin”.

V.Quluzadə onu da əminliklə bildirir ki, ABŞ (Amerika Birləşmiş Ştatları) İran və Rusiyanın hər atacağı addımı dərinliyinə qədər izləyir: “Amerika bizim regionda (bölgə) güclü şəkildə təmsil olunub, buna heç kimin şübhəsi olmasın”. Politoloq Rusiyanın sərhədlərimizə qoşun yığmasını aşağıdakı kimi əsaslandırdı: “Cənubi Koreyada keçirilən sammit (toplantı) zamanı Rusiya prezidenti Medvedyev özünün və Putinin adından Barak Obamadan xahiş edib ki, Moskvanın mövqeyini nəzərə alıb Rusiyanın sərhədlərində yerləşdirəcəyi raket sistemləri ilə bağlı güzəştlər etsin. Bu müraciət daha da güclü olsun deyə, Rusiya Azərbaycana qarşı təzyiqi artırır. Bu yolla Moskva Amerikanı hədələyir. Demək istəyir ki, Qarabağda müharibəni başlaya bilər. Şimal sərhədlərimizə qoşun yığmaqla göstərmək istəyir ki, həm şimal, həm də cənubdan Azərbaycanı vura bilər. Bununla da Obamanın mövqeyini yumşaltmaq istəyir. Obama isə Medvedyevə dedi ki, onlar Rusiyanın xahiş etdiyi güzəştləri yalnız ABŞ-da keçiriləcək seçkilərdən sonra edə bilərlər. Amma Amerika güzəştlərə getsin deyə, Rusiya indidən Azərbaycanı əzmək hədəsi ilə çıxış edir”.

V.Quluzadəyə görə, bu kimi addımlar tək Azərbaycanın əleyhinə olmayacaq: “Gürcüstanın əleyhinə də hansısa təhdidlər gözləniləndir. Yəni Obama öz qərarını dəyişsin, Rusiya sərhədlərində raket-radar sistemlərini yerləşdirməsin deyə, Putin divara dırmaşmağa hazırdır. Əslində bu, Medvedyevin yox, Putinin mövqeyidir”.

Politoloq Azərbaycanın yay aylarında Qarabağda hərbi əməliyyatlara başlayacağı barədə Rusiya kütləvi informasiya vasitələri (KİV) məlumatı “boş şey” adlandırdı: “Azərbaycan heç bir əməliyyatlara başlayan deyil. Bu, sadəcə, Rusiyanın təxribatıdır. Əvvəllər dəfələrlə dediyim kimi, plan aşağıdakından ibarətdir: əvvəl bütün dünya KİV-lərində yaymaq istəyirlər ki, Azərbaycan torpaqlarını güclə qaytarmaq üçün müharibəyə başlamağa hazırlaşır. Onlar bu zəmini yaradırlar ki, bizə özləri ilk zərbəni vurandan sonra Azərbaycanın Ermənistanı vurduğu üçün cavab aldığını desinlər. Plan bundan ibarətdir”.

Bəs rəsmi Bakı vəziyyətin ciddiliyini nəzərə alırmı? XİN mətbuat xidmətinin rəhbəri Elman Abdullayev məsələni şərh etmək istəmədi. Yeni müsavat

N.S