GünAzTv: Bu günlərdə İstanbulda Türk Dünyası İnsan Haqları Dərnəyi (TDİHD) və Avrasiya İnsan Haqları Konfederasiyasının (AİHK) təşəbbüsü ilə "Türk xalqlarının qadın problemləri" adlı 3-cü beynəlxalq konfrans keçirilib.    GünAzTv mətbuat mərkəzinin “Həftə-İçi”-nə istinadən yaydığı məlumata görə, Konfransda Dilarə Əliyeva adına Azərbaycan Qadın Hüquqlarını Müdafiə Cəmiyyəti (AQHMC) nəzdində fəaliyyət göstərən Din və Maarifçilik Mərkəzinin (DMM) rəhbəri Əntiqə Qurbanova da iştirak edib. Həmin tədbir barədə "Həftə içi"nə məlumat verən DMM sədri bildirdi ki, hər iki qurum tərəfindən keçirilən konfranslar əsasən qadın problemlərinə həsr olunub: "Burda təkcə ailə-məişət zəminində olan problemlər deyil, eyni zamanda qadınlarla bağlı digər ayrı-ayrı halları özündə ifadə edən problemlər yer alır. Bu sırada qadınların siyasi müstəvidə, vətəndaş cəmiyyəti quruculuğunda rolu da daha çox diqqət mərkəzində olub".       Ə.Qurbanovanın sözlərinə görə, tədbirdə türkdilli dövlətlərdən dəvət edilənlərlə yanaşı, eyni zamanda Bolqarıstan, Makedoniya, Bosniya, Rumıniya və Çin daxil olmaqla türkdilli xalqların yaşadığı 22 ölkədən nümayəndələr də iştirak edib: "Bu konfransa qatılanların əsas istək və məqsədi türkdilli xalqların qadın problemlərinin birlikdə müzakirəsi idi. Misal üçün: həmin ölkələrdə daha çox dil, ailə-uşaq problemləri qabarıq şəkildə özünü büruzə verir. Ən çox qabardılan məsələ dilin və dinin özünə qaytarılması idi. Yəni elə ölkələr var ki, orada yaşayan türkdilli xalqlar ana dillərindən, dini ayinlərindən azad şəkildə istifadə edə bilmirlər. Həmçinin uşaqlarının ana dilində təhsil almaları üçün hər hansı bir məktəb yoxdur".       DMM sədrinin sözlərinə görə, belə ölkələrin sırasında ilk yeri İran İslam Respublikası tutur. Bildirdi ki, Azərbaycan 2 yerə parçalandıqdan sonra Güneydə rejim 30 milyon Azərbaycan türkü ilə yanaşı, İranın bir neçə əyalətində yaşayan kiçik xalqlara da ana dillərində danışmaqla yanaşı, təhsil almalarına da əngəl yaradıb: "Təkcə İranda ermənilər bu qadağadan kənardadırlar. Onların həm kilsələri fəaliyyət göstərir, eyni zamanda sərbəst şəkildə öz dillərində danışa bilirlər. Güneydən fərqli olaraq Quzeydə - sovet hakimiyyətinin 70 il əsarətində olan Azərbaycanda isə rus imperiyası xalqın öz dilində danışmasına, təhsil almasına yasaq qoya bilmədi. Düzdür, buna cəhd edildi, amma xalqın dilə və dinə olan münasibəti rejimin ortaya qoyduğu mövqeyi sıradan çıxardı. Təbii ki, dilin və dinin inkişafında qadınların rolu burda öz sözünü deyib. Hər bir Azərbaycan qadını dünyaya gətirdiyi övladının dil və din haqqının əlindən alınmaması üçün böyük mübarizə yolu keçib".       DMM sədri dedi ki, konfransda müzakirə olunan digər bir məsələ ümumi qadın hüquqları ilə bağlı idi. Onun fikrincə, hazırda dünyanın bir çox ölkəsində qadınların qarşılaşdığı problemlər var ki, bunlar Azərbaycan qadınından da yan ötməyib.       Mərkəz rəhbəri həmçinin vurğuladı ki, bu kimi tədbirlərin ölkəmizdə keçirilməsi üçün də müəyyən işlər görmək niyyətindədirlər. Amma işin ümumi təşkili və həyata keçirilməsi yüksək maliyyə tələb etdiyindən hazırda bunu etmək çətindir. Lakin Azərbaycanın bu sahədə əsas aparıcı qadın təşkilatlarından olan AQHMC digər ölkələrdə keçirilən beynəlxalq konfrans və simpoziumlarda aktiv şəkildə iştirak edərək ölkəmizdəki vəziyyəti insanlara çatdıra bilir.