GünAz TV mətbuat mərkəzinin növbəti müsahibi, Azadlıq Partiyasının sədri, siyasətçi Əhməd Orucdur.

- Əhməd bəy, son günlər İran Azərbaycan əleyhinə təxribatları gücləndirib. İran rejimi, bu gedişlə hansı məqsədlərini həyata keçirməyə çalışır?

- Fars rejimi ona qarşı sanksiyaların (qadağaların) sərtləşdiyini və Qərb ölkələrinin iranın nüvə silahı əldə etməsinə imkan verməyəcəyini yaxşı bildiyinə görə regionda (bölgədə) vəziyyəti gərginləşdirməklə məşğuldur. İrana qarşı hücum olacağı halda qonşu dövlətlərin, o cümlədən Türkiyə və Azərbaycanın bu prosesdə (sürəcdə) yer almamasını istəyir. Eyni vaxtda müharibə olacağı halda İran ABŞ-ın (Amerika Birləşmiş Ştatkarı) və eləcə də onunla müttəfiq olan ölkələrin regiondakı strateji marağında olan obyektlərə(təsisat)- İncirlik NATO hərbi bazasına (payqah), Bakı Ceyhan kəmərinə və s. Zərbə endirəcəyini bildirir. İran ona hücum olarsa bu hücumun bütün region üçün, hətta dünya üçün fəlakət olacağını əsaslandırmağa, dünyanı inandırmağa və İrana hücumdan çəkindirməyə çalışır.

- Ümumiyyətlə, yaxın illərdə İranda molla rejiminin hakimiyyətdən getməsini real hesab edirsiniz?

- İranda molla rejiminin iflası qaçılmazdır. Bu prosesin nə vaxt reallaşması Qərb ölkələrinin İran ətrafı rayonda yarımçıq projelərinin, əsasən Suriyadakı proseslərin nə vaxt tamamlanması və İranın daxilində gedən proseslərlə birbaşa bağlıdır. İrandakı indiki irticaçı molla rejiminin açıq, demokratik idarəetmə sistemi ilə müqayisədə heç bir imkanlarının olmadığı hər kəsə, o cümlədən mollaların ideoloqlarına da bəllidir. Çanax antennalarını yığışdırmaqla, telefon və digər texniki yeniliklərə qadağa qoymaqla rejimi saxlamaq mümkünsüzdür. Texnoloji elə bir inkişafdadır ki, hər hansı ölkə öz insanını dünyadan təcrid edə bilməz! 

- Belə olan halda Güney Azərbaycan Milli Azadlıq Hərəkatı hansı addımları atmalıdır?

- Zənnimcə Vahid Azərbaycan ideyasının cazibəsi altında olan güneyli qardaşlarım bu gün əsasən bir məsələni – Milli Azadlıq Hərəkatında iştirak edən qüvvələrin fəaliyyətinin əlaqələndirilməsi, siyasilərin, prosesi idarəedənlərin bir araya gətirilməsi problemini həll etməlidir. İran ərazisində mövcud vəziyyət nəzərə alınmaqla ordakı soydaşlarımızın bir araya gətirilməsi üçün ən ümumi dəyərlərdən istifadə olunmalıdır. İnsanları hətta ən zəif şəkildə belə bağlayan rituallar (adab və risum), bayramlar, yubileylər (ildönümü), yarışlar, konsertlər, şeir gecələrindən istifadə olunmalıdır. İnsanlar arasında ayırıcı məsələlər qətiyyən önə çəkilməməlidir. Millət ici məsafələşməyə, parçalanmaya qətiyyən imkan verilməməlidir. Bu birlik qorunarsa zəruri məqamda milli enerji öz müqəddaratını təyin etmə mərhələsinə qədəm qoyacaq. İrandan kənarda, dünyanın istənilən nöqtəsində bu problemlə bağlı təşkilatların fəaliyyəti kordinasiya (həmahəngi) olunmalıdır- hər yerdə koalisiyalar (ittifaq, etilaf) yaradılmalı, fəaliyyəti uzlaşdırmalı, İran ərazisində yaşayan soydaşlarımızın haqq və hüquqları müdafiə olunmalı, milli xətdə olan soydaşlarımıza qarşı repressiyaların (sərkub) dayandırılması üçün dünyanın hər yerindən təpgilər gəlməlidir. Təşkilatlanma və fəallıq o dərəcədə olmalıdır ki, dünyanın bütün mərkəzlərində İranın yenidən qurulması məsələsində əsas söz sahibi bizim, azərbaycan türklərinin olduğunu hamı dərk etsin. Bu regionda indiyə qədər baş verənlər, regionun digər ölkələrindəki proseslərin gedişi dünyadakı əsas güclərlə türklərin əlaqələrinin yetərli olmadığını ortaya qoyub. Bu boşluq aradan götürülməlidir.21-ci əsr bütün tarixlər boyu öz milli, mənəvi dəyərlərinə sahib çıxan, regiona və dünyaya əməkdaşlıq, dinclik və barış gətirən türk əsridir. 

Söhbətləşdi: Elnur Eltürk

N.S