Urmuda narkobaron və beynəlxalq axtarışda olan şəxsin təqdir mərasimi keçirilib

SON XƏBƏRLƏR

Urmuda narkobaron və beynəlxalq axtarışda olan şəxsin təqdir mərasimi keçirilib

2024.04.06, 10:33

Aprelin 5-də Qərbi Azərbaycan əyalətinin mərkəzi Urmu şəhərində narkobaron və beynəlxalq axtarışda olan kürd əsilli Naci Şərif Zindəştidən təqdir mərasimi keçirilib

Gunaz.tv

Şəhərin "Vəhdət" zalında keçirilən mərasimdə Qərbi Azərbaycan əyalətinin baş hakimi Nasir Ətəbati və başqa vəzifəli şəxslər, polis və SEPAH zabitləri və komandirləri iştirak edib.

Mərasimdə iştirak edən hökumət məmurları Zindəştini "xeyriyyəçi" kimi təqdim edib və onun fəaliyyətlərini yüksək qiymətləndiriblər.

Zindəşti kimdir?

Naci Şərif Zindəşti 2007-ci ildə İranda narkotiklərin qanunsuz dövriyyəsi ilə əlaqəli açılmış cinayət işinə görə həbs edilərək edama məhkum edilib.

Ancaq sonradan o, müəmmalı şəkildə istintaqdan yayınaraq Türkiyəyə “qaçmağa” nail olub.

2018-ci ildə isə İstanbul Prokurorluğu bu şəxsə qarşı silahlı cinayətkar dəstə yaratma, narkotiklərin qanunsuz dövriyyəsi, adam oğurluğu və qəsdən adam öldürmə ittihamları irəli sürüb.

Lakin o, bundan bir müddət sonra hansısa gizli əllərin yardımı və ehtimal edilən anlaşmalar nəticəsində yenidən İranda peyda olub.

SEPAH komandirləri ilə yaxın münasibətdə olduğu bildirilən Naci Şərif Zindəşti onların və İran Təhlükəsizlik və Kəşfiyyat Nazirliyinin nəzarəti ilə bölgədə əsas narkotik maddələrin qaçaqmalçılarından biridir.

2020-ci ilin dekabr ayında Zindəştinin başçılıq etdiyi cinayətkar dəstənin İsveçdə 14 il sürgündə olan iranlı müxalifətçi Həbib Çəəbi Türkiyəyə səfər edəndən sonra İrana qaçdığı məlum olub.

Türkiyə Milli İstihbarat Təşkilatı (MİT) bununla bağlı əməliyyat keçirərək 11 İran agentini həbs edib. və saxlanılanların Naci Şərif Zindəştinin yaratdığı cəsus şəbəkəsinin üzvləri olduğu açıqlanıb.

Naci Şərif Zindəşti hazırda Qərbi Azərbaycan əyalətində "xeyriyyəçi və iş adamı" adı altında geniş biznes şəbəkəsinə başçılıq edir.

Zindəştinin başçılıq etdiyi qrupda ötən əsrin əvvəllərində Qərbi Azərbaycanda azərbaycanlılara qarşı soyqırım törədən İsmayıl Simitqonun nəvələri də təmsil olunur.

Naci Şərif Zindəşti və onun başçılıq etdiyi qrup üzvləri əyalət rəsmiləri ilə sıx əlaqəli fəaliyyət göstərir, Qərbi Azərbaycanda keçirilən parlament, bələdiyyə və şəhər şurası seçkilərində bölgəyə sonradan gələn kürd əsilli mühacirlərin seçilməsi üçün geniş kampaniya aparır, maliyyə dəstəyi verir.

Əyalətin kürd əsilli valisi Məhəmməd Sadiq Mötəmediyanla adı çəkilən qrupun və Naci Şərif Zindəştinin yaxın münasibətləri barədə dəfələrlə məlumatlar yayılıb.

GünazTV

GUNAZ.TV

SON XƏBƏRLƏR