Contact Us

SON XƏBƏRLƏR

Tarix təkrar olur; Repressiya güclənir, edamlar artır

2025.06.25, 12:00
Tarix təkrar olur; Repressiya güclənir, edamlar artır

İran hökuməti İsrailin hava hücumları qarşısındakı acizliyi səbəbindən atəşkəslə razılaşmağa məcbur olduqdan dərhal sonra, ölkə daxilində narazılara qarşı "əməliyyat"lara başlayıb.

Gunaz.tv

Atəşkəsin elan edilməsindən keçən qısa müddət ərzində Tehran, Həmədan, Təbriz və başqa bir neçə şəhərdə onlarla nəfər həbs edilib.

Bundan əvvəl də olduğu kimi saxlanılanılanların çoxu "İsrail və Mossad-la əməkdaşlıq"da günahlandırılır.

Belə görünür ki, uzun illər nüvə və raket proqramlarına xərclənən 100 milyardlarla dolların bir neçə gün ərzində havaya uçmasından hiddətlənən Tehran hökuməti, İsrail qarşısındakı acizliyinin acığını vətəndaşlardan çıxmağa başlayıb.

Bu, məğlubiyyətin ört-basdır edilməsinə, "daxili amillərin məğlubiyyətdə rol oynaması" fikrini aşılamağa hesablanıb. Eyni halda həm də, bundan sonra baş verməsi gözləniən etiraz aksiyalarına qarşı qabaqlayıcı tədbirlər kimi nəzərdə tutulub.

Həbs edilənlərə qarşı "Mossad-la əməkdaşlıq" ittihamlarının irəl sürülməsi, hakimiyyətin həmin şəxslərin və bundan sonra həbs ediləcək digərlərinin edamına zəmin yaratmağa çalışmasına dəlalət edir.

Bununla eyni vaxtda İran ədliyyə sisteminin sözçüsü Əsgər Cahangiri də "İsraillə müharibə ilə bağlı ittihamlara görə həbs edilən vətəndaşlara cəza növlərini sərtləşdirmək üçün casusluq qanununa dəyişiklik edildiyini" bildirib.

İran hökumətinin bundan əvvəl oxşar durumlarda törətdiyi əməllər, ölkədə repressiyaların daha da güclənəcəyi və siyasi müxaliflərin kütləvi edamına dayir nigaranlıqları artırıb.

Xatırladaq ki, 1988-ci ilin yayında İranın o vaxtkı rəhbəri Ruhullah Xomeyni İraqla atəşkəsə razılıq verdikdən dərhal sonra da oxşar repressiyalar və kütləvi edamlar başlamışdı.

Əvvəlcədən həbsdə olan və atəşkəsdən sonra həbs edilən siyasi məhbuslar "İraq hökuməti ilə əməkdaşlıq"da ittiham olunurdular.

Tehranın Evin və Qohərdəşt həbsxanalarında, Məşhəd, Şiraz, Əhvaz, Təbriz və başqa şəhərlərdəki həbsxanalarda Xomeyninin birbaşa göstərişi və “ölüm heyəti” kimi tanınan dörd nəfərdən ibarət qrupun təsdiqi ilə bir neçə gün ərzində minlərlə siyasi məhbus edam edilib.

Bununla eyni vaxtda minlərlə narazı saxlanılıb, bir neçə dəqiqəlik mühakimədən sonra çoxunun barəsində edam hökmü verilib.

Bu təcrübəyə əsasən, rejimin Əli Xamənei və "Sepah"ın məğlubiyyətini fürsət kimi dəyərləndirib narazılara qarşı kütləvi repressiyalara əl atacağı gözlənilir.

Cavid An

Açar Sözlər :

SEÇİLMİŞ XƏBƏRLƏR

Çox oxunanlar