İran İraqda nüfuzunu itirir

SON XƏBƏRLƏR

İran İraqda nüfuzunu itirir

2025.10.29, 11:49

Səddam Hüseyndən sonra İraqda yaranan boşluqdan istifadə edərək şiə qruplaşmaları arasında nüfuzunu artıran İran hökuməti sürətlə bu nüfuzu itirməkdədir.

Gunaz.tv

Rəsmi Bağdadın tərəfsiz milli siyasət yürütməyə başlaması ilə eyni vaxtda, İran təsiri altında olan qruplaşmalar da Tehrandan uzaqlaşmağa başlayıblar.

Bu, həmdə İran-Amerika və İran-İsrail qarşıdurmaları nəticəsində İraqın xəsarətlərdən yayınması üçün vacib amillərdən biri hesab edilir.

Xüsusən son zamanlar Tehranın zəifləməsi, Amerika və İsrail qarşısında acizliyi, yeni siyasi dövr və strategiyanın tətbiqinə başlayan Bağdadın, vəziyyətdən istifadə edərək İranın təsir dairəsindən çıxmaqda, ərəb ölkələri ilə münasibətlərini daha da genişləndirməkdə qərarlı olduğu görünür.

İranın dəstəklədiyi HƏMAS və Hizbullahın ağır zərbələr alması, Yəmən husilərinin gücünün azalması və Suriyada Bəşar Əsəd rejiminin süqutu İraqda yeni nəsil siyasətçilərin İran hegomonluğuna qarşı çıxmalarına səbəb olub.

Bununlada bu ölkədə İranın ən güclü təsir amili olan "Həşəd əl-Şəbi" silahlı qruplaşmasınında qurduğu şəbəkə çökməkdə, qruplaşma liderləri isə ölkə qanunları çərçivəsində seçkilərə qoşulmaqdadırlar.

Son vaxtlar SEPAH komandirlərindən daha çox iranlı siyasətçilərin, rəsmi şəxslərin Bağdada səfərləri də "Həşəd əl-Şəbi"nin nüfuzunun azalması və İranın hərbi təsir imkanlarını itirdiyi üçün siyasi təsir göstərməyə çalışdığına dəlalət edir.

Hadisələrin gedişatı göstərir ki, 2025-ci ildə İraqda baş verən proseslər Yaxın Şərq düzənində yeni bir mərhələnin başlanğıcıdır.

Uzun illər boyu böyük maliyyə və hərbi xərclər hesabına Tehrandan Aralıq dənizinə qədər "şiə ayparası"nı genişləndirməyə çalışan İran hökuməti indi hər yerdə uğursuzluqlarla üzləşib.

Xüsusən İraqda yeni müstəqil siyasi dövrün başlaması, İranın Suriyadan sonra ən böyük ideoloji səngərlərindən birinin əldən çıxmasına və "şiə ayparası" projəsinin tamamilə iflasa uğraması deməkdir.

Bununla yanaşı Pakistan və Əfqanıstan hökumətləri də İrana bağlı "Zeynəbiyyun" və "Fatemiyyun" qruplaşmalarına qarşı ciddi tədbirlər görməyə başlayıblar.

Qeyd olunan bölgələrdə ideoloji məğlubiyyətdən sonra, Əli Xaməneinin nəzarətində olan siyasi cərəyan və SEPAH Orta Asiya və Cənubi Qafqazda fəallaşmağa çalışsa da, vəziyyətdən irəli gələn məcburiyyətlərə görə, hazırkı hakimiyyətin bunu reallaşdırmağa gücü və marağı olmadığı hiss olunur.

Xüsusən Məsud Pezeşkian hökumətinin məcburiyyət qarşısında da olsa qonşularla münasibətlərdə yeni mərhələnin başladılması istiqamətindəki səyləri, Tehranın yeni siyasi-ideoloji səngərlər qurmasının çətin olacağından xəbər verir.

GünazTV

GUNAZ.TV

SON XƏBƏRLƏR