Məsud Yılmaz da ermənipərəst kampaniyanı pislədi Türkiyədə "Ermənilərdən üzr istəyək"ə qarşı ümummilli etiraz başlayıb Türkiyənin Trabzon şəhərində bəzi üzdəniraq ziyalıların başladıqları "Ermənilərdən üzr istəyək" kampaniyasına etiraz olaraq imzatoplama başlanılıb. Şəhərin Atatürk meydanında toplaşmış qeyri-hökumət təşkilatlarının təmsilçiləri adından çıxış edən Təhsil İşçiləri Həmkarlar Konfederasiyasının şöbə müdiri Coşkun Dilbər vurğulayıb ki, bəzi sözdə ziyalıların üzr istədiyi Ermənistan BMT-nin qətnamələrinə məhəl qoymayaraq Azərbaycan torpaqlarının 20 faizini işğal altında saxlayır. Ermənilər burada törətdikləri qətliamlar və 1 milyon azərbaycanlının öz yurdunda qaçqın kimi yaşamasına görə qardaş Azərbaycandan üzr istəməlidirlər. 1830-cu ilədək əhalisinin 70 faizi türk olan Ermənistanın paytaxtı Yerevanda etnik təmizləmə həyata keçirən ermənilərdən üzr istəyənlər əcdadlarının və şəhidlərin ruhuna xəyanət edirlər. C.Dilbər internet saytlarında iyrənc kampaniya keçirənləri meydanlara, xalqın arasına çıxmağa çağırıb. O əlavə edib ki, bu adamlar erməni diasporunun planlarını yerinə yetirir və Türkiyənin ərazi bütövlüyünə qəsd edərək onlarla əməkdaşlıq edirlər. Qeyd edək ki, meydanda qeyri-hökumət təşkilatlarının təmsilçiləri əllərində ermənilərin Xocalıda törətdikləri soyqırımı əks etdirən fotoşəkilləri tutublar. Başlanılan kampaniya Azərbaycan Türk Sənayeçi və İş Adamları Beynəlxalq Cəmiyyətinin də (TÜSİAB) kəskin etirazına səbəb olub. TÜSİAB-ın yaydığı bəyanatda deyilir ki, 2008-ci il martın 29-da prezident İlham Əliyev 31 Mart - Azərbaycanlıların Soyqırımı günü münasibətilə Azərbaycan xalqına müraciətində "Nə qədər ağır olsa da, biz soyqırımı faktlarından başqa xalqlara düşmənçilik və nifrət aşılamaq üçün istifadə etmək niyyətində deyilik" - deyərək xalqımızın əxlaqını, mərhəmət duyğusunu və qürurunu böyük bir əsilzadə kimi ortaya qoyub. Özlərini "ziyalı" adlandıran bir qrup şəxsin ermənilərdən üzr istəməsi isə iyrənc hərəkətdən başqa bir şey deyil. Bu cür təbliğat Dağlıq Qarabağ münaqişəsinin həlli istiqamətində görülən işləri baltalamaqdır. Türkiyə Cümhuriyyəti bu iyrənc təbliğata lazımi cavabı verib və bunu pisləyib. Fürsət düşdükcə qondarma soyqırımına məruz qaldıqlarını iddia edən ermənilər Türkiyənin şərq vilayətlərini "Qərbi Ermənistan" adlandırır və bu siyasətin davamı olaraq, Azərbaycan torpaqlarının bir hissəsini neçə ildir ki, işğal altında saxlayırlar. TÜSİAB bir daha bəyan edir ki, ermənilər və onların havadarları zülmə məruz qalan millətimizdən, sui-qəsd edilən Osmanlı dövlət xadimlərindən, Türkiyə Cümhuriyyətinin qətlə yetirilən diplomatlarından, işğal edilmiş torpaqlarda şəhid edilmiş və didərgin salınmış azərbaycanlı qardaşlarımızdan halallıq almaq, millətimizdən üzr istəmək, yaxın zamanda törətdikləri vəhşiliklərə görə hesab vermək və Dağlıq Qarabağdan geri çəkilmək məcburiyyətindədirlər. Tarix, beynəlxalq hüquq, ədalət və insanlıq bunu istəyir. "Ermənilərdən üzr istəməklə bağlı kampaniyanı təşkil edənlərin bu məsələnin geniş müzakirəsindən narahat olmasının səbəblərini anlayırıq. Onlar deyirlər ki, "ziyalılar"ın başladığı kampaniya barədə fikir yürütmək siyasətçilərin işi deyil. Bu adamlar Türkiyənin tarixini öz nöqteyi-nəzərlərindən məhkum edə bilərlər, biz siyasətçilər isə öz fikrimizi deyə bilmərik. Bu necə məntiqdir?!" Bu sözləri isə Milliyyətçi Hərəkat Partiyasından (MHP) olan millət vəkili, sabiq diplomat Dəniz Bölükbaşı deyib. O bildirib ki, ermənilərdən üzr istənlərlə Ermənistanın və diaspora ermənilərinin mövqeləri bir-birindən çox da fərqlənmir: "Mən Xarici İşlər Nazirliyində baş hüquq müşaviri olmuşam. Ermənilərin yəhudilərin İsveçrədəki qızılları və mal-mülkləri ilə bağlı hüquqi prosedurun eynisini Türkiyəyə qarşı tətbiq etmək istədiklərindən və eyni yolda getdiklərindən xəbərim var". D.Bölükbaşının fikrincə, bu kampaniyanın faydası da olub: "Türk milləti ölkəmizdəki "ziyalılar"ın həqiqi sifətini görmək imkanı da əldə edib". "Bu günə qədər 16 ölkənin, ABŞ-da isə 25 ştatın qanunverici orqanı "erməni soyqırımı"nı xüsusi qanunla tanıyıb. Amma indi daha ciddi addım atılması gündəmdədir. Gələn ilin aprelinə qədər ABŞ Konqresində "erməni soyqırımı"nın tanınacağı gözlənilir. Türkiyədəki üzr istəmə və imza kampaniyası ilə bu qərara psixoloyi zəmin hazırlamağa çalışırlar". "Hürriyət"in yazdığına görə, bu sözləri Böyük Millət Məclisindəki çıxışında vaxtilə baş nazir və xarici işlər naziri vəzifələrində çalışmış millət vəkili Məsud Yılmaz deyib. O, Türkiyədə prezidentdən tutmuş sadə vətəndaşa qədər hər kəsi bu kampaniyaya ciddi etiraz bildirməyə və dövlətin rəsmi mövqeyini müdafiə etməyə çağırıb. M.Yılmaz 1915-ci ildə baş verənlərin soyqırımı olmadığını vurğulayıb: "Ermənilərin köçürülməsi zamanı təəssüf ki, acı olaylar yaşanıb. Amma obyektiv tarixçilərin mövqeyi bundan ibarətdir ki, bu hadisələri dövlətin təşkil etdiyi soyqırımı kimi qiymətləndirmək mümkün deyil. Bu proseslərin texniki adı qarşılıqlı qətldir. Təəssüf ki, o vaxt çoxlu sayda türk, kürd və erməni vətəndaşımız həlak olub". M.Yılmaz onu da əlavə edib ki, Türkiyə dövləti uzun illər bu problemi yox sayıb, yalnız erməni terror təşkilatı ASALA terror aksiyaları başladıqdan sonra Osmanlı arxivlərində 1914-1915-ci illərlə bağlı sənədlər tarixçilər üçün açılıb: "Hazırda türk dövlətinin siyasəti bu mövzunun neytral beynəlxalq elmi heyət tərəfindən araşdırılması yönündədir. Bu, mədəni ölkələrin anlaya biləcəyi bir mövqedir. Türkiyədə hər kəs bu mövqeyi dəstəkləməlidir". Azər NURİYEV