GünAz TV mətbuat mərkəzinin növbəti müsahibi, “Sağlam İnkişaf və Maarifləndirmə” İctimai Birliyinin rəhbəri Anar Xəlilovdur.

- Anar bəy, necə illərdir ki, ölkənin ən fəal gənclər təşkilatının rəhbərlik edirsiniz. Bu gün Azərbaycan gəncliyinin siyasi-ictimai fəallığı Sizi qane edirmi?

- Düzdür əvvəlki illərlə müqayisədə bu gün Azərbaycan gəncliyinin ictimai siyasi fəallığı o qədər də fəal görsənməsə də mən deməzdim ki, gənclik fəal deyil. Sadəcə bu gün Azərbaycanda gedən yüksək inkişaf, stabillik (sebat) nəticəsində digər sahələrə elmə idmana maraq artmışdır. Artıq Azərbaycan gəncliyi o sahələrdə xüsusən də müasir elm sahələrində, dünyanın böyük idman arenalarında öz sözlərini deyirlər. Ancaq unutmaq olmaz ki, bizim ən böyük problemimiz Qarabağ problemi qalmaqdadır və mən hesab edirəm ki, xüsusən gənclərimiz ictimai fəallıqlarını artırmalıdırlar. Ancaq bu sahədə də problemlər var, xüsusən ictimai fəal gənclərimizə hər hansı bir formadasa həvəsləndirici dəstək verilməlidir. Mən həmişə demişəm ictmai müstəvi kommersiya (ticari) sahəsi deyil burda könüllü fəaliyyət göstərən gənclərimizə sonrakı mərhələlərdə öz karyeralarını (gələcəklərini) qurmaları üçün güzəştlər olunmalıdır. Bəlkə də uzun müddət könüllülük edən və sonradan iş tapmaqda çətinlik çəkmələri gənclərimizi bir qədər bu sahəyə marağını azaltmışdır. Ancaq bildiyiniz kimi Azərbaycan Gəncliyi Dövlət proqramı qəbul olunmuşdur bu proqramın uğurlu icrası mən hesab edirəm ki, bu problemi aradan qaldırmış olar.

- Bildiyimiz qədər avropanın fəal gənclər təşkilatı ilə sıx əməkdaşlıq əlaqələri qurmusunuz. Bəs, Avropa gənclər təşkilatının ölkəmiz haqqında düşüncələri nədən ibarətdir?

- Bəli, son zamanlar biz Avropanın bir çox nüfuzlu gənclər təşkilatları ilə əlaqələrimizi artırmışıq. Bildiyiniz kimi uzun müddət Azərbaycan informasiya blokadasında (mühasirə) qalmışdır. Ancaq bu gün bu blokada demək olar ki, aradan qaldırılmışdır. Artıq müsbət mənada Avropa gənclər təşkilatlarının rəyi bizim haqqımızda dəyişmişdir. Artıq biz öz informasiyamızı çatdıra bilirik. Xüsusən də Qarabağ həqiqətləri ilə bağlı. Ötən il bir çox Avropa gənclər təşkilatlarının nümayəndələrini biz Bakıya dəvət etdik özümüzün də çoxlu sayda Avropanın müxtəlif şəhərlərinə səfərlərimiz oldu. İstər gələn qonaqlarımızın öz gözləri ilə gördükləri istərsə də bizim gedərkən özümüzlə apardığımız təbliğat vasitələrinin köməyi ilə demək olar ki, yeni həqiqətə söykənən rəy formalaşır. Amma nəzərə almaq lazımdır ki, hələ çox işlər görməliyik. Səylərimizi artırmalıyıq, əlaqələrimizi genişləndirməliyik. Bir problem də var onu da demək istərdim bzim yerli gənclər təşkilatları arasında qısqanclıqlar müşaiyyət olunmaqdadır hesab edirəm ki, bu aradan götürülməlidir.

Biz əl-ələ verərək birgə bu istiqamətdə fəaliyyətimizi genişləndirməliyik. 

- Xaricdə Dağlıq Qarabağ məsələsinin tanıdılaması istiqamətində hansı layihələri həyata keçirməyə planlaşdırırsınız?

- Bizi demək olar ki, fəaliyyətimizin bu gün əsas hissəsini bu istiqamətdə qurmuşuq. Özümüzün hazırladığımız yüksək səviyyədə müxtəlif xarici dillərdə təbliğat vasitələri vardır. Hal-hazırda da bir neçə layihəmiz var onu hazırlayırıq və tezliklə Avropanın və MDB (Müstəqil Dövlət Birliyi) məkanının bir neçə ölkəsində bu layihənin nəticəsi olaraq tədbirlər keçirəcəyik. Bunlardan biri ingilis dilində olan sənədli filmdir. Bundan əlavə bzim birliyin yaratdığı üç dildə Qarabağa həsr olunmuş iki sayt da fəaliyyət göstərir.

- Güney Azərbaycanda cərəyan edən hadisələr izləyirsinizmi?

- Bəli, çox diqqətlə izləyirəm. Ancaq konkret (açıq, müşəxxəs) olaraq bu gün dəqiq fikir söyləməyə çətinlik çəkirəm. Güneylə bağlı mənim öz rəyim vardır sadəcə hesab edirəm ki, bizim bu sahəylə bağlı araşdırma aparan politoloqlarımız (siyasi şərhçilər) vardır və onların bəzilərinin fikirlərini dəyərli hesab etmək olar. Hər halda bir soz deyə bilərəm İran adlanan bu günkü dövlət biz Azərbaycan Türklərinin yaratdığı dövlətdir və inanmaq istərdim ki, az zaman içərisində bu tarixi ədalətsizlik də bərpa olacaq və orada yaşayan Azərbaycan türkləri öz dövlətlərinə tam sahib çıxacaqlar. 

Söhbətləşdi: Elnur Eltürk