Ərdoğandan Sarkoziyə önəmli xatırlatma

SON XƏBƏRLƏR

Ərdoğandan Sarkoziyə önəmli xatırlatma

2021.10.20, 07:36

Gunaz.tv

GünAz TV: Türkiyə baş naziri Rəcəb Tayyib Ərdoğan bildirib ki, “Sarkozinin atası əlcəzairlilərin soyqırımı zamanı Əlcəzairdə Fransa legionunda (lejyon) hərbi xidmətdə olub.”

Türkiyənin baş naziri Rəcəb Tayyib Ərdoğan Fransa prezidenti Nikolya Sarkozinin atası Paul Sarkozinin Əlcəzairdə fransızların törətdikləri soyqırımda iştirak etdiyini bildirib. Xarici işlər naziri Əhməd Davudoğlu isə «erməni soyqırımı»nın uydurma olduğunu məhz Fransa qanunlarının qadağan etdiyi yerlərdə ucadan deyəcəklərini bəyan edib.

Ərdoğan bildirib: «Fransa parlamentində Türkiyəni yaxından maraqlandıran bir qanun qəbul edildi. Bu mövzu ilə bağlı qiymətləndirmələr apardıq. Bəzi tədbirlər həyata keçirəcəyik. Bu gün Fransada təxminən 5 milyon müsəlman var. Fransa və Avropada ayrı-seçkiliyin, anti-İslam mühitinin nə qədər təhlükəli ölçülərə çatdığı ortaya qoyulub. Sarkozi türk və müsəlman düşmənçiliyi vasitəsilə seçkiləri udmaq ehtirasına girişib.

Əlcəzairdə 1945-ci ildən etibarən təxminən əhalinin 15 faizi fransızların qırğınına məruz qalıb. Bu bir soyqırımdır. Əlcəzairlilər sobalarda kütləvi şəkildə yandırılıblar. Əgər Fransa prezidenti hörmətli Sarkozi bu soyqırımdan xəbərsizdirsə, getsin atası Sarkozidən soruşsun. Atası 1940-cı illərdə Əlcəzairdə Fransa legionunda (lejyon) hərbi xidmətdə olub. Əminəm ki, oğluna qırğın haqqında danışacağı çox qeylər var.

İspaniyadan qaçıb Osmanlıya sığınan yəhudilər bu gün Yunanıstanda Selanikdə yerləşiblər. Selanik Osmanlı nəzarətindən çıxdıqdan sonra 1904-cü ildə Fransaya köçənlərdən biri də Benedikt Malladır. O da hörmətli Sarkozinin babasıdır. Sarkozi Türkiyənin tarixində soyqırım tapa bilməz. Əgər öz ailəsinə baxsa, orada Türkiyənin və türklərin köməyindən, xoş niyyətindən başqa heç bir şey görməz».

Əhməd Davudoğlu isə mövzu ilə bağlı olaraq bunları deyib: «Biz səsimizi yüksəldəcəyik. Bizim belə bir haqsızlıq qarşısında səsimizin qısılacağını, «zamana buraxaq bunu» deyəcəyimizi düşünürlərsə, yanılırlar. Dünən hörmətli baş nazirimizin də çox dəqiq söylədiyi kimi, dünyanın hər yerində səsimizi yüksəldəcəyik. Heç bir yerdə sizlərin səsinizin batıq olmasını istəmirəm. Heç bir yerdə boynumuzu əyməyəcəyik. Bizə edilən təzyiqlərə qarşı heç bir yerdə səssiz qalmayacağıq. Onların qadağan olduğu yerlərə gedəcəyik, açıq və gur səslə «biz bu soyqırım iddialarını tanımırıq» deyəcəyik».

GUNAZ.TV

SON XƏBƏRLƏR