Əli Kərimli: “Fransada qəbul olunan qanun yalnız Türkiyəni yox, ümumbəşəri dəyərləri hədəf seçən qanundur”

SON XƏBƏRLƏR

Əli Kərimli: “Fransada qəbul olunan qanun yalnız Türkiyəni yox, ümumbəşəri dəyərləri hədəf seçən qanundur”

2021.10.20, 07:36

Gunaz.tv

GünAz TV: AXCP (Azərbaycan Xalq Cəphəsi Partiyası) sədri Əli Kərimli bildirib ki, "Fransa hakimiyyəti seçki maraqlarına görə bütövlükdə Avropa dəyərlərinə yaraşamayan hərəkətdən çəkinməlidir."

"Bu qanun yalnız Fransa-Türkiyə münasibətlərinə kölgə salmır və yalnız qardaş ölkə hədəf seçilməyib. Bu, eyni zamanda ümumbəşəri dəyərləri hədəf seçən qanundur". Bu sözləri "Azadlıq"a AXCP sədri Əli Kərimli Fransa parlamentinin "erməni soyqırımı"nın inkar edilməsinin cinayət sayılmasını nəzərdə tutan qanun layihəsini qəbul etməsinə münasibət bildirərkən deyib.

Əli Kərimli bildirib ki, bu qanunla Avropa konvensiyalarında (konvansiyon) təminat verilən ifadə azadlığı prinsipi (ilkə, əsl) kobud şəkildə məhdudlaşdırılır: "Bütövlükdə bu qanun Avropa məkanında ifadə azadlığı baxımından yaradılan olduqca neqativ (mənfi) bir presedentdir (örnək, əsas). Hesab edirəm ki, bu qanuna nəinki Türkiyə, Azərbaycan hökumətləri və cəmiyyətləri, o cümlədən Avropa strukturları (saxtar, yapısal) və Fransanın vətəndaş cəmiyyəti də etiraz etməlidir. Heç şübhəsiz ki, bu qanun Senat tərəfindən təsdiqlənərsə, Fransanın özü üçün də müəyyən fəsadlar yaradacaq".

AXCP sədrinin fikrincə, Azərbaycan bu addımı birmənalı olaraq pisləməlidir: "Həm hökumət, həm də bütövlükdə cəmiyyət bu qanuna etiraz etməlidir. Azərbaycan və Türkiyə təkcə dost qardaş deyillər, həm də strateji mütəffiqdirlər. Belə məqamlarda strateji əməkdaşlıq şurası toplanmalı, birlikdə elə tədbirlər nəzərə alınmalıdır ki, Fransa parlamentinin yuxarı palatası - Senat əmin olsun ki, bu səhvi düzəltmək Fransanın milli maraqlarına uyğundur. Bu qanun yalnız türkləri, azərbaycanlıları aşağılamayacaq. Eyni zamanda Fransanın iqtisadi, siyasi, geopolitik maraqlarına da zərbə vurmuş olacaq. Buna Fransa Senatını inandırmaqdan ötrü təcili olaraq, heç bir tərəddüd etmədən Türkiyə və Azərbaycan hakimiyyətləri birlikdə, koordinasiya (həmahəngi) olunmuş şəkildə qəti addımlar atmalıdırlar. Eyni zamanda demokratik Avropa ictimaiyyəti, Fransa ictimaiyyəti, dünya azad mətbuatı və dünya qeyri-hökumət təşkilatları şəbəkəsi ilə məqsədyönlü iş aparılmalıdır. Fransa hakimiyyəti seçki maraqlarına görə bütövlükdə Avropaya, Avropa dəyərlərinə yaraşamayan belə hərəkətdən çəkinməlidir".

GUNAZ.TV

SON XƏBƏRLƏR