GünAz TV: Azərbaycanın dövlət və hökumət rəsmiləri, mədəniyyət və incəsənət xadimləri xalq artisti Qədir Rüstəmovun vəfatı ilə əlaqədar başsağlığı veriblər.

Başsağlığında deyilir: “Azərbaycanın musiqi mədəniyyətinə ağır itki üz verib. Milli musiqi sənətinin görkəmli nümayəndəsi, xalq artisti, Prezidentin fərdi təqaüdçüsü (əməkli, bazneşestə) Qədir Çərkəz oğlu Rüstəmov 2011-ci il dekabr (December) ayının 14-də, ömrünün 77-ci ilində vəfat edib.

Qədir Rüstəmov 1935-ci il noyabrın (November) 20-də Ağdam rayonunda (şəhər, məntəqə) anadan olub. Orta məktəbi bitirərək əvvəlcə Asəf Zeynallı adına Bakı Orta İxtisas Musiqi Məktəbində, daha sonralar isə Üzeyir Hacıbəyli adına Ağdam Orta İxtisas Musiqi Məktəbində təhsil alıb. Ustad sənətkarlarımızdan muğamın incəliklərini mənimsəyən Qədir Rüstəmov bu illər ərzində xanəndəlik sənətinin sirlərinə daha da dərindən yiyələnməyə müvəffəq olub.

 Gənc yaşlarından Ağdamda mahir muğam ifaçıları mühitində yetkin xanəndə kimi formalaşan Qədir Rüstəmov nadir istedadı, məlahətli səsi və özünəməxsus ifa tərzi sayəsində az vaxt ərzində tanınaraq insanların böyük məhəbbətini qazanıb. O, ömrünün sonuna kimi xanəndəlik sənətinə sadiq qalıb.

Qarabağ xanəndəlik məktəbinin görkəmli nümayəndəsi Qədir Rüstəmov Azərbaycan xalq musiqisinin incəliklərini bilən sənətkar olaraq milli musiqi xəzinəmizi çox həzin və yanğı dolu ifaları ilə zənginləşdirib. O, çoxəsrlik parlaq keçmişə malik Azərbaycan musiqisində layiqli yer tutaraq milli mədəniyyətimizin inkişafına böyük töhfələr verib. Muğam ifaçılığı ənənələrinin və Azərbaycan xalq musiqisinin saflığının qorunub saxlanılması Qədir Rüstəmovun sənət fəaliyyətinin başlıca qayəsi idi. Unudulmuş xalq mahnılarımızdan bir çoxu məhz onun ifası ilə yenidən həyat qazanıb. Sənətkarın son dərəcə məharətlə oxuduğu “Sona bülbüllər”, “Apardı sellər Saranı”, “Laçın”, “Ay dili-dili”, “Sarı gəlin” və neçə-neçə digər mahnı hər kəsin qəlbində kövrək duyğular və səmimi hisslər oyadır.

 Ecazkar səsi, təkrarolunmaz ifaçılığı və dinləyicinin mənəvi aləminə nüfuz etməklə onda güclü emosional (ehsasi, atifi) təsir yaratmaq bacarığı musiqisevərləri və muğam bilicilərini Qədir Rüstəmov sənətinin vurğununa çevirib. Mahir muğam ustasının ifasında səslənən bir sıra muğam dəstgahları, o cümlədən “Rast” və “Çahargah” musiqi mədəniyyətimizin qızıl fonduna daxil olub. O, dahi Azərbaycan bəstəkarı Üzeyir Hacıbəylinin həyat və yaradıcılığı ilə bağlı filmdə klassik muğam ifaçısı obrazını (vəchə) ustalıqla canlandırıb.

 Qədir Rüstəmovun milli musiqimizə hədsiz vurğunluğu və sədaqəti gənc xanəndələr nəsli üçün əsl sənət məktəbidir.

 Milli musiqi mədəniyyəti sahəsində nailiyyətlərinə görə Qədir Rüstəmov Azərbaycan Respublikasının ali mükafatı olan “Şöhrət” ordeni ilə təltif edilib.

 Görkəmli xanəndə, səmimi və təvazökar insan Qədir Çərkəz oğlu Rüstəmovun əziz xatirəsi xalqımızın qəlbində həmişə yaşayacaq.

 Allah rəhmət eləsin!

 İlham Əliyev

 Artur Rasizadə

 Oqtay Əsədov

 Ramiz Mehdiyev

 Elçin Əfəndiyev

 Hacıbala Abutalıbov

 Mehriban Əliyeva

 Əbülfəs Qarayev

 Fatma Abdullazadə

 Habil Əliyev

 Əlibaba Məmmədov

 Zeynəb Xanlarova

 Arif Babayev

 Alim Qasımov

 Səkinə İsmayılova

 Ağaxan Abdullayev

 Canəli Əkbərov

 Tələt Qasımov

 Mənsum İbrahimov

Mərhumun cənazəsi vidalaşmaq üçün 2011-ci il dekabrın 15-də saat 13.00-dan 15.00-dək Üzeyir Hacıbəyli adına Bakı Musiqi Akademiyasının binasında (Şəmsi Bədəlbəyli küçəsi, 98) qoyulacaq. Dəfn mərasimi Fəxri xiyabanda keçiriləcək”.