Yaqut Qəmbər: “Bu gün DAK-ın Güney Azərbaycan Milli Hərəkatında rolu cox yüksəkdir”- Müsahibə

SON XƏBƏRLƏR

Yaqut Qəmbər: “Bu gün DAK-ın Güney Azərbaycan Milli Hərəkatında rolu cox yüksəkdir”- Müsahibə

2021.10.20, 07:36

Gunaz.tv

GünAz TV mətbuat mərkəzinin növbəti müsahibi, Dünya Azərbaycanlıları Məclisinin Qadınlar Şurasının sədri Yaqut Qəmbərdir.

- Yaqut xanım, bu günlərdə Brüsseldə keçirilən Dünya Azərbaycanlıları Konqresinin (DAK) Birlik Qurultayında iştirak etmisiniz. Qurultayla bağlı təəssüratlarınızı bizimlə bölüşərdiniz...

- DAK-in XII qurultayı aprel ayının 27-29 tarixində Belçikanın Brüssel şəhərində keçirildi. Təşkilatçılıq və fəaliyyət gözəl təşkil olunmuşdu. Nizamnamədə dəyişikliklər haqqında müzakirələr keçirildi və qəbul olundu. İdarə heyətinə seçkilər şəffaf səsvermə yoluyla həyata keçdi. Güney və Quzey Azərbaycanda olan problemlər, Qarabağın işğalı, Xocalı soyqırımı, insan haqlarının pozulması, Güneydə Azərbayacn dilinin qadağan olunması, ana dilində məktəblərin olmaması, quzeydə 17 nəfər siyasi dustaqların hələ də azadlığa buraxılmaması və s. məsələlər müzakirə olunub çıxışçılar tərəfindən dilə gətirildi.

-Necə düşünürsünüz bu qurultay diaspor prosesinə (sürəc) təkan verəcəkmi?

DAK təşkilatı indiyə qədər diaspor prosesinə, insanların birləşməsinə, güney və quzeydən Amerkaya, Avropaya, MDB (Müstəqil Dövlət Birliyi) ölkələrinə köç edib, vətəndən uzaqda yaşayan soydaşlarımızın bir amal-Azərbaycanımızın dünyaya tanınması üçün əlindən gələni əsirgəməmişdir. Adından göründüyü kimi bu dəfəki qurultayın adı da Dünya Azərbaycanlıları Konqresinin XII Birlik Qurultayı idi. Bəzi insanların DAK-ı parçalamaq, araya nifaq salmaq, hansısa vəzifə üçün Azərbaycan uğrunda gedən proseslərə kölgə salmaq, kimlərinsə xoşuna gəlmək üçün problemləri arxa plana salıb, dilə gətirmək əvəzinə pafoslu çıxışlar ilə ürək bulandırmaq, öz şəxsi ambisiyası (cahtələbi) uğrunda vicdanını danmaq kimi “vəzifəsi” vardır. Amma bu qurultay da isbat etdi ki, nə olursa olsun Azərbaycanın gələcəyi üçün, birlik üçün diaspor prosesinə əngəl ola bilməz.

- Ümumiyyətlə, DAK-ın Güney Azərbaycan Milli Hərəkatında rolunu necə dəyərləndirirsiniz?

- DAK-ın Güney Azərbaycan Milli Hərəkatında rolu cox yüksəkdir və getdikcə səsimiz daha gur cixir. Urmiya gölünün qurudulması, güneydə insanların zindana salınıb işgəncələrə məruz qalması, haqlı davaları uğruna canlarından keçməyə hazır olan qardaş-bacılarımızın edamı, ana dilimizin bərpası, yasaqların aradan qaldırılması 35 mlnluq xalqın haqlarının pozulması məsələsi həmişəki kimi göz önündədir. Və bu ciddi məsələlərdə xalqa dəstək olub azad və müstəqil Azərbaycan uğrunda gedən davada DAK xalqının yanındadır və bu ciddi problemləri, İran rejimi altında inləyən Azərbaycan türklərinin haqq səsini dünyaya çatdırmaq üçün əlindən gələni əsirgəmir.

Söhbətləşdi: Elnur Eltürk

N.S

GUNAZ.TV

SON XƏBƏRLƏR