Suriyada silahlı toqquşmalar davam edir

SON XƏBƏRLƏR

Suriyada silahlı toqquşmalar davam edir

2021.10.20, 07:36

Gunaz.tv

GünAz TV: Yerli Koordinasiya (həmahəngi) Komitələri ötən gün hökumət qüvvələrinin ölkə ərazisində azı 18 nəfəri qətlə yetirdiyini xəbər verir.

Suriyada BMT (Birləşmiş Millətlər Təşkilatı) müşahidəçiləri Həmə şəhərinə baş çəkdiyi bir arada Bəşər Əsəd qüvvələri monitorinqlərdən (nəzarətdən) kənarda qalmış şəhərlərdə və qəsəbələrdə etirazçılara qarşı əməliyyatları davam etdirib. Yerli Koordinasiya Komitələri ötən gün hökumət qüvvələrinin ölkə ərazisində azı 18 nəfəri qətlə yetirdiyini xəbər verib. Ordunun Duma şəhəri və Dəməşqin şəhərkənarı qəsəbələrini artilleriya (topxana) bombardmanına məruz qoyduğu məlum olub.

GünAz TV mətbuat mərkəzinin “Ans press”ə istinadən yaydığı məlumata görə, Dumada 2 nəfərin öldüyü bildirilir. İnternetdə yayımlanmış həvəskar görüntüdə adıçəkilən şəhərdə mərmi zərbəsindən baş vermiş partlayışı və pulyemotlardan (müsəlsəl) açılan atəşi görmək olur. Suriya İnsan Haqqları Monitorinq qrupu Dumada 2 nəfərin ölümünü təsdiqləyib.

Suriya dövlət kanalı BMT silahsız müşahidəçilərinin Həmə monitorinqi və onların şəhər icra başçısı ilə görüşü haqqında xüsusi reportaj yayımlayıb. Həvəskar görüntüdə BMT zabitlərinin (əfsər) eyni zamanda qiyamçı Rəstan şəhərinə baş çəkdiyini görmək olur. Kadrlarda müşahidəçi heyətinin başçısı polkovnik (sərhəng) Əhməd Himişe və mavi başlıqlı digər zabitlər Azad Suriya Ordusunun zabitləri ilə söhbətləşir. Həmin vaxt etiraz edən Rəstan sakinlərinin “Xoş getdin Əsəd”, “Xalq hakimiyyəti devirmək istəyir” kimi hökumət əleyhinə şüarlar səsləndirdiyini eşitmək olur.

BMT-nin hesablamalarına görə, Suriyada ötən ilin mart ayından davam edən toqquşmalar zamanı 9 mindən çox insan öldürülüb. Müxalifət eyni zamanda, yüzlərlə insanın həbs edilərək işgəncələrə məruz qaldığını bildirir. Ölkədən qaçan suriyalılar isə qonşu İordaniya və Türkiyəyə üz tuturlar. Təkcə Türkiyəyə keçən suriyalıların sayı 25 mini ötüb. N.S

GUNAZ.TV

SON XƏBƏRLƏR