Soydaşlarımız Rusiyanın ən zəngin iş adamları sırasında

SON XƏBƏRLƏR

Soydaşlarımız Rusiyanın ən zəngin iş adamları sırasında

2021.10.20, 07:36

Gunaz.tv

GünAz TV: Dünyaca məşhur “Forbes” jurnalının rus versiyası Rusiyanın ən varlı iş adamlarının siyahısını dərc edib.

GünAz TV mətbuat mərkəzinin APA-ya istinadən yaydığı məlumata görə, siyahıda birinci yeri özbək əsilli iş adamı Alişer Usmanov tutub. Onun 18,2 milyard ABŞ (Amerika Birləşmiş Ştatları) dolları dəyərində sərvəti var. “Metalloinvest”in sahibi olan Usmanov Londonun "Arsenal" futbol klubunun sahiblərindən biridir. O, həm də Rusiyada mediamaqnat olaraq tanınır və ölkənin ən məşhur qəzetlərindən olan “Kommersant”ın sahibidir.

İkinci sırada “Novolipetsk” polad şirkətinin sahibi Vladimir Lisin qərarlaşıb. Keçən il 24 milyard dollarlıq sərvəti ilə ilk sırada olan V.Lisinin hazırkı sərvəti 15,9 milyard dollar dəyərindədir.

Üçüncü sırada 15,3 milyard dollarlıq varidatı ilə “Severstal” polad şirkətinin sahibi Aleksey Mordaşov, dördüncü sırada “Interros” şirkətinin sahibi Vladimir Potanin (14,5 milyard dollar) yer alıb. İlk beşliyi azərbaycanlı iş adamı, “LUKoil” şirkətinin prezidenti Vahid Ələkbərov tamamlayır - 13,5 milyard dollar.

Altıncı yerdə qərarlaşan “Alfa Group”un sahibi Mixail Fridmanın 13,4 milyard dollar sərvəti var. Rusiyada son prezident seçkilərində iştirak edən iş adamı Mixail Proxorov yeddinci sırada yer alıb. Keçən il 18 milyard dollarlıq varidatı ilə üçüncü yerdə olan M.Proxorovun builki sərvəti 12,4 milyard dollar dəyərindədir.

“Renova Group”un sahibi Viktor Vekselberq 12,4 milyard dollarla səkkizinci, Londonun “Çelsi” futbol klubunun sahibi Roman Abramoviç isə 12,1 milyard dollarlıq sərvəti ilə doqquzuncudur. Onuncu yerdə isə “Novatek” şirkətinin sahiblərindən olan Leonid Mixelsondur. Onun sərvəti 11,9 milyard ABŞ dolları dəyərindədir.

Rusiyanın ən zəngin iş adamlarının orta yaş həddi 50-dir. Ən gənc iş adamı 16 yaşlı Deni Bajayevdir. 200 nəfərlik siyahıda 127-ci sırada olan D.Bajayev 750 milyard dollarlıq sərvətə malikdir.

Qeyd edək ki, Rusiya milyarderlərinin siyahısında V.Ələkbərovdan başqa daha 4 azərbaycanlının adı var. Bunlar biznesmen, “Ukrayna mehmanxanası” ASC-nin Direktorlar Şurasının sədri Zarah İliyev (35-ci yer - 2,4 milyard dollar), “Krokus” qrupunun prezidenti Araz Ağalarov (61-ci yer - 1,6 milyard dollar), “Nortqaz” şirkəti Direktorlar Şurasının üzvü Fərhad Əhmədov (108-ci yer - 900 milyon dollar) və AST Şirkətlər Qrupunun sahibi Telman İsmayılovdur (121-ci yer - 800 milyon dollar).

N.S

GUNAZ.TV

SON XƏBƏRLƏR