GünAzTv: İranın indiki situasiyada belə, ən azı müsəlman təəssübkeşliyini bir kənara qoyaraq Ermənistana qucaq açması əslində gözlənilməz haldır. Məsələ bundadır ki, beynəlxalq aləmin İrana qarşı təpkisinin getdikcə artdığı şəraitində belə Bakı dostluq və qonşuluq prinsiplərini əsas tutaraq müsəlman dövlətinin əleyhinə olan planlarda yer almaq təklifindən imtina edir.

Qarşılığında isə İranın Azərbaycan torpaqlarının 20 faizini 20 ilə yaxın müddətdə işğalda saxlayan təcavüzkar dövlətin himayəçisinə çevrilməsi, təbii ki, sərt reaksiya doğurmaya bilməz. Xəbər verildiyi kimi, İran və Ermənistan Araz çayı üzərində gücü 130 Mvt olan Mehri su elektrik stansiyasının (SES) tikintisinə başlamaq haqqında razılığa gəlib. Artıq Ermənistanın energetika naziri Armen Movsiyan iranlı həmkarı Məcid Namcu ilə İrəvanda SES-in tikintisi ilə bağlı memorandum imzalayıblar. Bu da Ermənistanın zülmətdən xilas olmasına, digər planlarını gerçəkləşdirib Azərbaycana qarşı daha da quduzlaşmasına imkan yaradacaq. Ermənistan və İranın energetika nazirləri sərhəd zonalarında Araz çayında təbii mühitin qorunması ilə bağlı memorandum, üçüncü İran-Ermənistan yüksək gərginlikli elektrik verilişi xəttinin tikintisi barədə razılaşma da imzalayıblar. SES tikintisi üçün 323 milyon dollar lazımdır. Bu layihəni İran İnvestisiya Şirkəti maliyyələşdirəcək. M.Namcu bildirib ki, Ermənistan baş naziri Tiqran Sərkisyanın Tehrana qarşıdakı səfəri zamanı iki ölkə arasında əməkdaşlığın gələcək istiqamətləri dəqiqləşdiriləcək və ikitərəfli sənədlər imzalanacaq. Göründüyü kimi, İran Ermənistanı bütün varlığı ilə himayə edir və onun problemlərinin həllinə çalışır. Ermənistana İranın bütün istiqamətlərdə dəstək olması ötən illərin, hətta Tehranda İranın vasitəçiliyi ilə Qarabağ məsələsi müzakirə olunan zaman Şuşanın işğal edilməsi də müsəlman qonşumuza dərs olmayıb. 1992-ci ilin mayında ermənilər İranın vasitəçilik niyyətinə Şuşa şəhərini işğal etməklə cavab verdilər və Tehranı pis vəziyyətdə qoydular. Ancaq buna baxmayaraq, İran təcavüzkar ölkənin ayaqda durması üçün ötən on illərdə hər şeyə getdi.   Milli Strateji Təhqiqatlar Mərkəzinin sədri Natiq Miri mövzunu şərh edərkən İranın müdafiə nazirinin Azərbaycana səfərini xatırlatdı: “Nazir çıxışları zamanı İranın Azərbaycanla dostluğu haqqında təntənəli bəyanatlar səsləndirdi. Mən hətta onda da demişdim ki, bu, səmimi mövqe deyil. İran Azərbaycana münasibətində səmimi olsaydı, Dağlıq Qarabağ məsələsi bu qədər uzanmazdı. İranın Mehridə Ermənistan üçün SES tikməsi heç də İranın təcavüzkar dövlətə yeganə dəstəyi deyil. Gələn il İrandan Ermənistana dəmir yolunun çəkilişlərinə başlanılacaq. İran bir müddət öncə Ermənistana 100 min tonlarla taxıl göndərməklə onu faktiki olaraq canavarın ağzından aldı. Bütün bu faktlar İranla Ermənistan arasında strateji müttəfiqliyin olmasını göstərir. Bu cür strateji müttəfiqlikdən sonra İranın Azərbaycanla bağlı bəyanatı boş sözlərdən başqa bir şey deyil”. N.Mirinin sözlərinə görə, İran hazırkı situasiyada əslində daha çox Azərbaycan yönümlü siyasət yürütməli, Bakını qıcıqlandıracaq addımlara getməməlidir: “Çünki İrana qarşı hərbi əməliyyatlara başlanılması məsələsi gündəmdədir. Hərbi əməliyyatla bağlı planların Gürcüstan və Azərbaycan üzərindən həyata keçirilməsi məsələsi də var. Azərbaycan isə indiki situasiyada İrana yönəlik siyasət yürüdür və xarici qüvvələrin plasdarmına çevrilmək planına müqavimət göstərir. Hətta BMT-nin embarqolarına baxmayaraq, Azərbaycan benzin hazırlamaq üçün istifadə olunan maddələrin İrana aparılmasını dayandırmır. Belə olan təqdirdə bizim İrandan ən azı səmimi münasibət gözləməyə haqqımız var. Tehran hakimiyyəti bu barədə ciddi düşünməlidir”. Ekspert Ermənistanı təcavüzkar siyasətindən daşındırmaq və Azərbaycan torpaqlarının işğalına son qoymaq üçün Tehranın əlində ciddi təsir imkanlarının olduğu qənaətindədir: “İran Azərbaycanla səmimi dostluq münasibətlərini davam etdirərsə və Ermənistanın yeganə oksigenini kəsərsə, o zaman Ermənistan qısa müddətdə təngnəfəs olacaq. Bu mənada cənub qonşumuz təcavüzkarı durdurmağa çalışmalı, düşdüyü vəziyyətdən çıxmaq üçün Türkiyə və Azərbaycanla əməkdaşlıq üzərində ciddi düşünməlidir”. Yeni musavat