GünAzTv: Ermənistanda müxalifətin dünən keçirdiyi etiraz mitinqi orada çıxış edən Erməni Milli Konqresinin lideri Levon Ter-Petrosyanın uzun niqti və hakimiyyətin sərt tənqidi ilə yadda qalıb.

Müxalifətin korrupsiya ilə vuruşmağa məcbur olduğunu deyən eks-prezident bildirib ki, hakimiyyətdə 27 oktyabr 1999-cu il cinayət hadisələrindən sağ qalan dəstə idarəçilik sistemini ələ keçirib. Bu barədə SİA “news.am” xəbər agentliyinə istinadən xəbər yayıb. 

Qeyd edək ki, 27 oktyabr 1999-cu ildə Ermənistanda Qarabağ klanını hakimiyyətə gətirən hadisə, parlament gülləbaranı baş vermişdi. Hadisə vaxtı baş nazir Vazgen Sarkisyan, spiker Karen Dəmirçiyan və başqa 6 rəsmi də həlak olmuşdu. O vaxtki prezident Robert Köçaryanın apardığı danışıqlardan sonra yaraqlılar girov götürdüyü deputatları azad edib təslim olmuşdular və sonradan ömürlük həbs edilmişdilər.

Həmin hadisədən sonra dövlətin inkişafının da qarşısının alındığını söyləyən Erməni Milli Konqresinin lideri bildirib ki, ölkə həyatına əlavə olunan kukla partiyalar, psevdo ziyalılar, elektron media hökumət orqanlarına dəstək verir, başqa sözlə cinayətdə şərikdirlər: “Azad mətbuat olarsa, korrupsiya da olmaz. Misal olaraq deyə bilərəm ki, kölgə iqtisadiyyatı müxtəlif səbəblərdən hakimiyyətlərin nəzarətindən kənarda qalır. Hər halda, mən bunu deməyə cəsarət edirəm ki, faktiki olaraq Ermənistanda heç bir kölgə iqtisadiyyatı yoxdur. Bizim hökumət orqanlarımızın diqqətindən heç nə qaçmır və heç bir kölgə iqtisadiyyatı onların xəbəri olmadan mövcud ola bilməz. Bütün iqtisadi fəaliyyətləri cinayətkarlar istiqamətləndirir və bir mərkəzdən idarə olunur. Ona görə də, hesab edirəm ki, bu kölgə iqtisadiyyatı deyildir, ancaq soyğunçuluq və ya dövlət reketçiliyidir. Ermənistanın iki büdcəsi var. Biri rəsmİ şəkildədir, rəqəmlər xalqa açıqlanır. İkinci büdcə isə hakimiyyət səlahiyyətlilərinin cibindədir. İkinci birincidən daha da böyükdür. Əgər büdcənin yarısı oğurlanılmazsa, ölkəmizin büdcəsi 2,5 milyard ABŞ dolları əvəzinə 5-6 milyard dollar olar. Başqa sözlə, orta əmək haqqı 283 dolların əvəzinə 566 dollar olması mümkündür. Bir sözlə, aylıq əmək haqqı və ya təqaüd bizim hər birimizdən oğurlanır”.

Əmlak bərabərsizliyin getdikcə daha təhlükəli hal aldığını diqqətə çatdıran Petrosyan vaxt keçdikcə varlıların daha varlı, kasıbların isə daha kasıb olduğunu vurğulayıb. İnsanların ölkəni tərk etməkdən başqa bir seçimi qalmadığını söyləyən eks-prezident bildirib ki, yırtıcı hökumət orqanları tərəfindən həyata keçirilən tədbirlər, etdiyi soyğunçuluq yalnız öz yaxınlarının rifahını yüksəltmək məqsədilə edilir. O, türklərə və azərbaycanlılara yönələn bəyanatların da lovğa sözlər olduğunu qeyd edib: “Bütün bu həyasızlıq vətənpərvərliyin, milli maraqların əleyhinədir. Soyqırımın tanınması Qarabağın müstəqilliyi şüarları ilə pərdələnir, lovğa sözlərlə türklərə və azərbaycanlılara bəyanatlar ünvanlanır. Hər halda bu aydındır ki, onlar üçün vətən yalnız işğal olunmuş ərazidir, ictimai maraqlar, şəxsi fayda, soyqırımın tanınması və Qarabağın azad olması qeyri-qanuni məqsədlər üçün ən ucuz sikkədir. Bu aydındır ki, 5-6 milyard dollar real büdcəmiz ola bilər. Təqaüdlər, ictimai sektorların maliyyələşməsi, eyni zamanda ordunun, səhiyyənin, təhsilin, elm və mədəniyyətin maliyyələşməsinə ayrılan vəsait artırılmalıdır. Hətta rəsmən elan edilmiş büdcə də talanır, xüsusi xatırlatmaya ehtiyac görmürəm. Xalq talan edilməsəydi, yaxşı bir ölkədə yaşayardıq, insanlarımız ölkədən qaçmazdı. Hamımız bunu başa düşürük, ölkəmizi qarət edirlər. Niyə insanlar kasıblıqda yaşamalıdırlar? Niyə insanlar başqa ölkələrə qaçmağa məcbur olurlar? Bunların hamısına dözmək millətin şərəfinin çatışmazlığını qəbul etməyini göstərir, bu faciədir”.

Korrupsiyanın Ermənistan hakim dairələrini əhatə etdiyini deyən Levon Ter-Petrosyan bildirib ki, bir başqa formada olmasına baxmayaraq, bu bütün ictimai müəssisələrdə də mövcuddur: “Korrupsiya məktəblərə də nüfuz etmişdir. Hansı ki, bu nəsillərin təhsilinə dağıdıcı təsir edir. Xarici dil məktəblərinin açılışı bu sferada korrupsiyanı əbədiləşdirmək tendensiyanı dərinləşdirəcək”.

Müxalifət lideri hesab edir ki, qarşısıalınmaz korrupsiya mürəkkəb mexanizmlərin nəticəsidir. Onun fikrincə, aşağıdakı məqamlar bu mexanizmin təşkilində iştirak edir:

- iqtisadiyyatın demək olar ki, tam inhisarlaşması, xüsusilə idxalda,

- dövlət mülkiyyətinin satış qiymətlərinin bazar qiymətlərindən aşağı olması,

- Saxta aksion və tenderlərin keçirilməsi,

- milli valyutanın süni şəkildə revalvasiyası,

- pul vahidinin stabilliyini saxlamaq üçün milli ehtiyatların xərclənməsi,

- statistik məlumatların manipulyasiyaları,

- idxalda kvota bölgüsü,

- iri kapitalı vergidən kənarda saxlamaq üçün kiçik və orta sahibkarlığın üzərinə əlavə vergi yükünün qoyulması,

- şübhəli fondların müxtəlifliyinin yaranması və əlavə büdcə hesablarının açılışı

- gündəlik tələbat mallarının qiymətlərində süni artımlar,

- xarici cinayətkarlar və mafiya qrupları ilə əməkdaşlıq,

- sərhədlərdən uzaqda kölgə razılaşmaları,

- qohumların adından işgüzar fəaliyyət növləri.

Petrosyan qeyd edib ki, Qərbin erməni hakimiyyətinin cinayətkarlığına göz yumması erməni xalqına qarşı cinayətdir: “Hakimiyyətin korrupsiya ilə vuruşmağa niyyəti yoxdur. Bu onlar üçün əlverişsizdir, bu onların maliyyə mənbələrinin yox olması ilə nəticələnər. Beynəlxalq təşkilatlar isə bu pis cəmiyyət ilə vuruşmağa laqeyddir. Hakimiyyət xalqın əlindən alınmış var-dövləti sadə adamlara qaytarmalıdır. Bu mövcud olan oliqarxların, böyük biznesmenlərin bütün vergiləri ödəməsi ilə baş verməlidir. Ermənistanda korrupsiya ştatını qəti şəkildə ləğv etmək mümkündür. Əgər hakimiyyət dəyişikliyi baş verməsə, bu fəlakətə gətirib çıxaracaq”.