GünAzTv: Rusiya Dövlət Dumasının MDB və soydaşların işi üzrə komitəsinin rəhbəri Aleksey Ostrovski söylədiyi fikirlər ciddi marağa səbəb olub.

Onun sözlərinə görə, Dağlıq Qarabağ münaqişəsi ilə bağlı beynəlxalq ictimai rəy Azərbaycanın tərəfindədir və bu dövlətin ərazi bütövlüyünü dəstəkləyir, bu ölkənin yurisdiksiyasına daxil olan rayonların işğal olunması faktını qəbul edir. Ostrovski deyib ki, Minsk qrupunda Rusiya istisna olmaqla heç kim 100 faiz bu münaqişənin nizamlanmasında maraqlı deyil:"Bu məsələdə son dərəcə maraqlı olan Rusiyadır, çünki biz coğrafi baxımdan qonşuyuq, həm Ermənistan, həm də Azərbaycanla strateji münasibətlərimiz var". Ostrovskinin fikirləri Rusiya Dumasında Qarabağ münaqişəsinə münasibətin dəyişməsi kimi qiymətləndirilir. Bu arada Rusiya Xarici İşlər Nazirliyinin MDB ölkələri dördüncü departamentinin rəhbəri Andrey Kelin APA-nın Moskvaya ezam olunmuş əməkdaşına verdiyi açıqlamada deyib ki, Dağlıq Qarabağı münaqişənin nizamlanmasına dair danışıqların üçüncü tərəfi saymaq mümkün deyil, əks təqdirdə bu konfiqurasiyada tərəflər heç bir razılığa gələ bilməzlər:"Doğrudan da İrəvanın əvvəllər irəli sürdüyü şərtlərdən biri Qarabağın danışıqlar prosesində iştirakı etməsi, danışıqların üç tərəfinin olmasıyla bağlı idi. Lakin bu şərt o mərhələdə irəli sürülürdü ki, o zaman Ermənistan əsasən hesab edirdilər ki, Qarabağ ya Ermənistanın tərkibində olmalı, yaxud da tam müstəqil dövlət olmalıdır. Amma sonralar baxışlar dəyişdi. Və bəzi prezidentlər dövründə - ad çəkmək istəmirəm - bu qərara gəlindi ki, qeyd olunan şərtsiz ötüşmək daha yaxşıdır. Çünki bu cür yanaşma qeyri-konstruktiv atmosfer formalaşdırır. İki tərəf razılığa gələ bilər, amma bu konfiqurasiyada heç bir məsələ barədə razılaşma əldə etmək mümkün deyil". Andrey Kelin bildirib ki, Ermənistan daxilində gedən diskussiyalarda bir qisim hesab edir ki, Dağlıq Qarabağ onsuz da danışıqlarda siyasi mövqenin formalaşdırılmasının bir hissəsidir və bu faktın Madrid prinsiplərində əks olunması imkanı var: "Amma Dağlıq Qarabağı tərəf qismində qələmə vermək, bu, sadəcə mümkün deyil. Çünki Azərbaycan hesab edir ki, bura onun öz ərazisidir və heç bir saziş, heç bir sənəd bu şəkildə ortaya çıxa bilməz". Dağlıq Qarabağın tərəf kimi qəbulunun mümkünsüzlüyü barədə Rusiya XİN rəsmisinin səsləndirdiyi qəti fikirlər də müəyyən ümidlər yaradır. Azərbaycan Liberal Demokrat Partiyasının sədri Fuad Əliyev hesab edir ki, Azərbaycan öz haqlı mövqeyini dünyaya çatdırmaq üçün bütün imkanlardan istifadə etməlidir, məhz belə olan halda uğurlu nəticələr qazanmaq mümkündür: "Biz Rusiyanın Liberal Demokrat Partiyası ilə 6 ildir ki, əməkdaşlıq edirik. Onların Qarabağ problemiylə bağlı mövqeyi əvvəllər tamam başqa cür idi. Biz isə həm tədbirlərdə, həm də şəxsi görüşlərdə Azərbaycanın haqlı mövqeyini onların nəzərinə çatdırırdıq. Rusiya mətbuatında mövqelərimiz, yazılarımız dərc olundu. Məhz bu cür addımlardan sonra bəzi şəxslərin mövqelərində ciddi dəyişiklik baş verdi. Elə Ostrovskinin özü də əvvəllər başqa fikirdə idi, ermənipərəst mövqedən çıxış edirdi. İndi isə görürsünüz ki, tam doğru mövqe ortaya qoyur. Onu da deyim ki, ermənilər də Rusiya Dövlət Duması ilə çox sıx əməkdaşlıq edirlər. Məhz bunun nəticəsidir ki, Jirinovski açıq ermənipərəst mövqedən çıxış edir. Gennadi Züqanov və digərləri açıq bildirməsələr də, ermənilərlə yaxşı münasibətlər qurublar və onların tərəfini saxlayırlar. Azərbaycan da bu məsələyə ciddi fikir verməli, təbliğatı yüksək səviyyədə qurmalıdır. Biz çalışmalıyıq ki, Rusiya Dövlət Dumasının üzvlərinin böyük əksəriyyəti Azərbaycanın haqlı mövqeyini müdafiə etsinlər. Bəzən belə fikirlər səslənir ki, buna nail olmaq mümkün deyil. Ancaq məncə biz öz işimizi görsək, çox şeyə nail ola bilərik. Ostrovskinin mövqeyi bunun parlaq sübutu saymalıyıq. İstərdik ki, Azərbaycanda fəaliyyət göstərən digər siyasi qüvvələr də bu istiqamətdə səylər göstərsinlər. Bu işdə Rusiyada yaşayan soydaşlarımız, diaspor təşkilatlarımız da aktivlik göstərməlidir". Fuad Əliyev hesab edir ki, aktiv təbliğatla Rusiya dövlətinin Dağlıq Qarabağ probleminə yanaşmasının dəyişəcəyinə ümid bəsləyir: "Doğrudur, Rusiya Ermənistanın mövqeyini açıq şəkildə müdafiə edir. Ancaq biz sakit dayanmamalı, öz işimizi görməliyik, ümid edirəm ki, bunun müsbət nəticəsi olacaq. Həm iqtidar, həm də müxalifət təbliğat istiqamətində ciddi işlər görməlidir. Rusiyada səfərdə olan hər bir şəxs çalışmalıdır ki, təbdirlərdə, şəxsi görüşlərdə haqlı mövqeyimizi çatdıra bilsin". Xalq cəbhəsi