GünAzTv: Erməni lobbisinin Metyu Brayzanın Bakıya səfir təyinatını əngəlləmək üçün atdığı yeni addımlar Amerikada da ermənilərə qarşı ikrah yaradıb.

Nüfuzlu “The Washington Post” qəzeti dünənki redaksiya məqalələrində Amerikadakı erməni təşkilatını və Senatda onlara lobbiçilik edənləri sərt tənqid edib. Qəzet yazıb ki, Amerikadakı erməni lobbisi Ermənistanın maraqlarını müdafiə etmək səyləri çox vaxt əks-effekt verir və Ermənistanın özünə zərbə vurur. Xəbər verildiyi kimi, Senatın Xarici Əlaqələr Komitəsi Brayzanın namizədliyini təsdiqləyib, lakin səsvermədən dərhal sonra ermənilərə xidmət edən senatorlar Barbara Bokser və Robert Menendez məsələnin Senatın ümumi yığıncağında səsverməyə çıxarılmasına veto qoyduqlarını açıqlayıblar.

“The Washington Post” yazır ki, noyabrda Konqresə keçiriləcək aralıq seçkilərdə yenidən senator olmaq üçün sərt mübarizə aparan Bokser və Menendez öz seçki kampaniyaları üçün prezident Barak Obamanın Azərbaycana təyin etdiyi Brayzanın namizədliyini əngəlləyir. Qəzet xatırladır ki, Brayza kifayət qədər təcrübəli diplomatdır və Qafqaz regionunu çox yaxından bilir. “Bu iki senator Amerika Erməni Milli Komitəsinin (ANKA) sifarişini yerinə yetirir. Onların lobbiçiliyi xüsusilə zərərlidir, Bokser və Menendez erməni seçicilərinin maraqlarını müdafiə etdiklərini deyirlər. ANKA öz saytında təntənə ilə xəbər verib ki, Bokser Brayzanın namizədliyinin Senatda təsdiqlənməsinə veto qoyub. Bu o deməkdir ki, diplomatın namizədliyi yaxın gələcəkdə təsdiqlənə bilməz. Robert Menendez da Bokserə qoşularaq veto tətbiq edib. Beləliklə, Brayza lobbi qruplarının çəkişməsinin hədəfindədir. O, həm demokratların, həm respublikaçıların hakimiyyəti dövründə Birləşmiş Ştatların Qafqazdakı maraqlarını 13 il ərzində uğurla təmin edib. Minsk Qrupunun həmsədri kimi 3 il işləyib. Brayza hər iki tərəfdə hörmətlə qarşılanıb, hər iki münaqişə tərəfinin hökuməti onun səfir təyinatını dəstəkləyir. Bəs belə olan halda Bokserin etirazına səbəb nədir? Senator iddia edir ki, Brayza "Azərbaycanın Ermənistana qarşı təcavüzkar hədələrinə" güclü etiraz bildirmir. Ancaq bu gülməli iddiadır. Brayza bütün digər namizədlər kimi Dövlət Departamentinin sərt təlimatları əsasında hərəkət etməlidir, buna görə də o, ancaq prezident Barak Obamanın hər iki tərəfi zorakılıqdan çəkindirməyə çağıran bəyanatını təkrarlayıb. Əslində onun sülh danışıqlarının keçmiş iştirakçısı kimi daha geniş toqquşmaları əngəlləmək üçün imkanları daha böyükdür".“The Wahsington Post” yazır ki, senator Robert Menendez də ANKA-nın eybəcər təbliğatını təkrar edərək Brayzanın Türkiyə ilə “çox sıx əlaqələrini” şübhə altına alıb. O, diplomatın xanımının türk əsilli olduğunu qabardır. Qəzet yazır ki, bu zaman senator Zeyno Baranın Türkiyədəki indiki hökumətin sərt tənqidçisi olduğunu nəzərə almır. “Biabırçılıqdır ki, Amerika diplomatının xanımının etnik mənsubiyyəti ona qarşı istifadə edilir. Senator Menendez əvvəlcə Brayzanın xanımından narahatlıq bildirsə də, sonradan onun ofisi bu biabırçılığı düzəltməyə çalışaraq bildirdi ki, söhbət diplomatın xanımının Türkiyə rəsmiləri ilə əlaqələrindən gedir. Lakin bizim söhbətin hansı məmurlardan getdiyi barədə sorğumuza cavab gəlmədi” deyə, məqalədə bildirilir. Qəzet yazır ki, ANKA Ermənistanın maraqlarını müdafiə etmək əvəzinə bir çox hallarda ona zərbə vurub. Bu təşkilatın lobbiçilik fəaliyyəti Ermənistanla Türkiyə və Azərbaycanla Ermənistan arasında razılaşmaların əldə olunmasını daha da çətinləşdirib. Bununla da Ermənistanın birdəfəlik Rusiyanın asılılığına keçməsinə şərait yaradıb. “Əgər ANKA təcrübəli diplomatın Bakıya səfir təyinatını əngəlləsə, bu, Amerikanın Qafqazdakı nüfuzunun azalmasına səbəb olacaq və regionda müharibə riskini artıracaq. Bokser və Menendez isə bu cür maraqların xeyrinə lobbiçilk etməklə özlərini biabır edir” deyə, qəzet məqaləni yekunlaşdırır.Dövlət Departamenti də Metyu Brayzanın ABŞ-ın Azərbaycandakı səfiri vəzifəsinə namizədliyini dəstəklədiyini bildirib.Dövlət Departamentinin rəsmisi “Amerikanın səsi”nə müsahibəsində Brayzanın ABŞ-ın Azərbaycandakı səfiri vəzifəsinə layiq olduğunu deyib: “Cənab Brayza ABŞ-da Amerikanın səfiri vəzifəsi üçün bizim namizədimizdir. O bu vəzifəni yerinə yetirmək üçün lazım olan keyfiyyətlərə malikdir və biz ümid edirik ki, Senat onun namizədliyini mümkün qədər tez bir zamanda təsdiq edəcək”. Yeni musavat