GünAzTv: İran prezidenti Mahmud Əhmədinejadın çıxışını yalnız özü başa düşüb, zalın yarısı isə boş olub.

BMT Baş Assambleyasının 65-ci illik sessiyası çərçivəsində təşkilata üzv olan 130-dan çox ölkənin dövlət və hökumət başçılarının iştirakı ilə minilliyin inkişaf problemlərinə dair Nyu Yorkda keçirilən sammit dünən yekunlaşıb. Sammit dünyada kasıblığın azaldılmasına və aclıq çəkənlərə yardımların artırılması kimi qlobal problemlərə həsr olunmuşdu.

Üç günlük toplantının yekunlaşmasının ardınca Baş Assambleyanın illik plenar sessiyası start götürüb. Bu sessiya çərçivəsində BMT üzvü olan ölkələrin dövlət və hökumət başçılarının dünyadakı siyasi problemlərə dair çıxışları olacaq. Xəbər verildiyi kimi, Azərbaycan da bu il Baş Assambleyada prezident səviyyəsində təmsil olunacaq. Prezident İlham Əliyevin bu gün Nyu Yorka yola düşəcəyi gözlənilir, sabah onun BMT mənzil qərargahında ABŞ (Amerika Birləşmiş Ştatları) prezidenti Barak Obama ilə ikitərəfli görüşü planlaşdırılıb.Minilliyin inkişaf problemlərinə dair sammitdə isə maraqlı məqamlar yaşanıb. Baş Assambleyanın toplantısına gələn Svazilend krallığının nümayəndə heyəti zalda maraqlı səhnələrə səbəb olub. Belə ki, bu Afrika ölkəsinin kralı və onu müşayiət edənlər yarıçılpaq vəziyyətdə olublar. Kadrlardan görünür ki, Svazilend kralından arxa cərgədə oturan Türkiyə nümayəndə heyəti başda prezident Abdulla Gül olmaqla onu böyük maraqla seyr edir. Habelə ön cərgədə oturanlar gözlərini yarıçılpaq kraldan çəkə bilmir. Xatırladaq ki, toplantıda çıxış edən Azərbaycan xarici işlər naziri Elmar Məmmədyarov əsasən ölkədəki iqtisadi və sosial inkişafdan, neft gəlirlərinin sosial rifaha yönəldilməsindən bəhs etmişdi.Ondan fərqli olaraq Ermənistan xarici işlər naziri Edvard Nalbəndyan siyasi çıxış edib və minilliyin inkişaf problemlərini bir kənara qoyaraq ölkəsinin təcavüzkar siyasətinə haqq qazandırmağa çalışıb. Azərbaycanın hərbi büdcəsini artırması və silahlanması haqda narahatlıqla danışan Nalbəndyan deyib ki, bu hərəkətlər regional stabillik üçün təhlükədir. Nazirin sözlərinə görə, Azərbaycan gücdən istifadə etməməklə bağlı razılaşmadan imtinada davam edir.“Bu isə BMT prinsiplərinə ziddir. Biz hələlik minilliyin inkişafı məqsədlərinin yerinə yetirilməsi işində irəliləyişdən danışırıq, hansı ki, beynəlxalq ictimaiyyətin diqqətindən kənarda qalıb. Dağlıq Qarabağ xalqı daha yaxşı həyat şəraiti yaratmaq və insan haqlarını müdafiə etmək üçün maksimal səy göstərir. Və bunu beynəlxalq ictimaiyyətin köməyi olmadan edir. Dağlıq Qarabağ müvafiq yardım proqramlarını gözləməkdə davam edir” - deyə Nalbəndyan bildirib.Xəbərlərə görə, Nalbəndyan Qarabağ münaqişəsinə dair müzakirələr aparmaq üçün Nyu Yorkda olan Minsk Qrupu həmsədrləri ilə də görüşüb. Həmsədrlərlə Azərbaycan xarici işlər nazirinin də görüşü gözlənilirdi. Həmçinin Nyu Yorkda Ermənistan və Azərbaycan xarici işlər nazirləri arasında ikitərəfli danışıqlar planlaşdırılıb.İran prezidenti Mahmud Əhmədinejadın BMT tribunasından çıxışı da maraqlı məqamlarla müşayiət olunub. Ötən illərdə olduğu kimi, Əhmədinejadın çıxışı zamanı ABŞ və Avropa ölkələrinin nümayəndə heyətləri Baş Assambleyanın iclas zalını tərk ediblər. Zalın yarısı boş olub və tribunaya qalxan Əhmədinejad fars dilində çıxış etməyə başlayıb. Bu səbəbdən onun dediklərini özü və nümayəndə heyətindən başqa heç kim başa düşməyib. Bunu görən Əhmədinejad çıxışına bir dəqiqə fasilə verərək tərcüməçiləri günahlandırıb. Bundan sonra çıxışını davam etdirib. Amma BMT-nin tərcüməçiləri bildiriblər ki, onlar yalnız çıxışın tərcümə edilmiş mətnini oxuyurlar. Həmin tərcümə edilmiş mətndə isə Əhmədinejad indiki “qeyri-demokratik, ədalətsiz dünyada islahatlar aparmağa” çağırır. İran prezidentinin tərcüməçilər tərəfindən oxunan çıxışında deyilir ki, əgər Birləşmiş Ştatlar bu ölkəyə hücum etsə, misli görünməmiş müharibə ilə üzləşəcək: “Sərhəd tanımayan, əsl müharibə olacaq. Hansı ki, Amerika heç vaxt belə müharibə görməyib və onda qalib gəlməyib”.İtaliya qəzeti “La Repubblica” yazır ki, Əhmədinejadın şousu bu dəfə istədiyi kimi alınmayıb. Ancaq onun Baş Assambleyanın plenar iclasında yenidən çıxış etmək imkanı var. “Daily News” qəzeti isə yazır ki, Əhmədinejadın mühafizəsi üçün fövqəladə təhlükəsizlik tədbirləri görülüb. Onun mühafizəsinə sərf edilən vəsait 7 milyon dollara yaxındır. Yeni musavat