GünAzTv: “The Foreign Policy” jurnalı  yazır ki, “Tehran region ölkələrini xəbərdar edir ki, Amerika qoşunlarını ərazilərində yerləşdirsələr, axırı pis olacaq”.

Son vaxtlar İran Cənubi Qafqazda öz nüfuzunu genişləndirməyə və ABŞ-ı (Amerika Birləşmiş Ştatları) bu regiondan sıxışdırmağa çalışır. Amerikanın nüfuzlu “The Foreign Policy” jurnalında dərc edilmiş məqalədə belə deyilir.

Müəllif Heyli Suitlend Edvards qeyd edir ki, son vaxtlara qədər ABŞ-ın bölgədəki əsas tərəfdaşı sayılan Gürcüstan da İranın bu səylərini dəstəkləyir. Məqaləyə görə, İranın Azərbaycan, Gürcüstan və Ermənistanla bağlı siyasəti praqmatik iqtisadi və geosiyasi məsələlər üzərində qurulub: “Belə görünür ki, Tehranın gərgin diplomatik səyləri sayəsində İran partlayış təhlükəsinin güclü olduğu Cənubu Qafqazda əsas stabilizasiya amilinə çevrilə bilər. Bir çox optimist analitiklər hətta belə hesab edirlər ki, İranın bu strateji əhəmiyyətli regionda özünü yaxşı aparması cüzi də olsa Vaşinqton-Tehran barışına yönələn ilk addımlar hesab edilə bilər”.Jurnal xatırladır ki, son bir il ərzində İran rəsmiləri region ölkələrinə səfərlər edərək ikitərəfli iqtisadi layihələrə əhəmiyyətli investisiyalar yatırıblar və simvolik dostluq jestləri ediblər. Həmçinin qatı amerikapərəst Gürcüstan prezidenti Mixail Saakaşvili İran prezidenti Mahmud Əhmədinejadı ölkəsinə səfərə dəvət edib. “İran onu Ermənistanla birləşdirəcək dəmir yol layihəsinin tikintisini, habelə Azərbaycanı Fars körfəzi ilə birləşdirən neft kəmərinin çəkilməsini təklif edir” - deyə məqalədə bildirilir.ABŞ ordusunun araşdırma mərkəzi olan “Strategic Studies Institute”dən analitik Stefen Blənkə görə, İranın əsas motivi digər ölkələrin, xüsusən ABŞ-ın onun sərhədləri yaxınlığında mövqelərini həddən artıq möhkəmləndirməsinə yol verməməkdir. Belə ki, İran Amerika qoşunlarının yer aldığı İraq, Əfqanıstan və Pakistanla qonşudur. Bir tərəfdən də Cənubi Qafqazda Amerika bazasının peyda olması Tehran üçün əsl fəlakət olardı. “Onlar daim deyirlər ki, baxın, biz dostuq, iqtisadi əməkdaşlığımız güclüdür, amma siz ərazinizdə Amerika qoşunlarının yerləşməsinə icazə versəniz, axırı pis olacaq” - deyə yüksək rütbəli gürcü rəsmisi jurnala bildirib.İranın Tiflisdəki səfiri Məcid Sabir isə deyir ki, Tehran Gürcüstanın yeganə etibarlı dostu və müttəfiqidir. “Amerika sizə dar gündə köməyə gəlmədi, gürcülər bunu nəzərə almalıdır” - deyə səfir jurnalistlərə bildirib. Jurnal yazır ki, İran Azərbaycanı regional problemləri, o cümlədən Qarabağ münaqişəsini kənar qüvvələrin ümidinə buraxmamağa və regional güclərin köməyi ilə həll etməyə çağırır. Lakin Tehranın Azərbaycanla bağlı xarici siyasəti daha çox İran əhalisinin üçdə birini təşkil edən azərbaycanlıların müstəqillik uğrunda mübarizəyə qalxa biləcəyi qorxusuna söykənir. Ona görə də İran Azərbaycanda dini ideologiyanı yayır. Bildirilir ki, region ölkələri İranın dostluq jestlərini ehtiyatla da olsa qəbul ediblər. Bununla belə, İranın Ermənistan və Azərbaycanla iqtisadi tərəfdaşlığı geniş deyil. “İranın əsas strategiyası nüvə silahı əldə etməkdir və günlərin birində bu məsələ onunla qonşuları arasında diskussiya predmeti olacaq”, - deyə jurnal yazır.Musavat