GünAzTv: Güney Azərbaycan Milli Azadlıq Cəbhəsi (GAMAC) bəyan edir ki, Güney Azərbaycanda basqı altında yad dildə təhsil almağa məcbur edilimiş azərbaycan türkləri aparılan bu siyasətə kütləvi etirazlarla cavab verməlidir...

Hər il mehr  ayının 1-də (Sentyabr ayının 23-ü)   İranda təhsil ilinin ilk günündə milyonlarla azərbaycanlı təhsilə ana dilində deyil, fars dilində başlamaq məcburiyyətində qalır. Onların ana dilində təhsil almaq, mətbuat vasitələrindən yararlanmaq, dil və mədəniyyətini inkişaf etdirmək kimi hüquqlardan məhrum edilmələrinin mahiyyətində, fars hegemonluğunun təsiri altında 35 milyon Azərbaycan türkünün milli kimliyini unutdurmaq və bir millət kimi varolma haqqını inkar siyasəti durur.

Məlumdur ki, dil, millət, mədəniyyət anlayışları biri digərini doğuran, tamamlayan amil olduğundan bir millətin bütöv varlığını özündə mühafizə edir. Hər bir millətin varlıq fəlsəfəsi onun dilindən qaynaqlanır və dil ictimai hadisə olaraq bir millətin mənəvi, siyasi, iqtisadi həyatına birbaşa təsir göstərir.

Ana dili hər bir millətin düşüncə tərzini, bütöv varlığa fəlsəfi baxışını özündə əks etdirir. Elə bu səbəbdən ana dilində düşünmək, yazıb oxumaq və ictimai-siyasi münasibətlərdə onun təsirli rolundan faydalanmaq bir millətin bütünlüyünü, kültürəl birliyini və inkişafını təmin edir. Bütün bunlarla yanaşı dil milli yaddaşın, duyğu və düşüncələrin, maddi və mənəvi dəyərlər sisteminin keçmişini və gələcəyini birləşdirən yeganə amildir. Bu həqiqətlərdən yola çıxan azərbaycan türkləri ana dilində təhsil hüququnun bərpa edilməsi uğrunda illərdir ki, sivil mübarizələrini davam etdirirlər. Lakin, İrandakı siyasi rejimlər bu günə kimi bu haqqı tələb edən millətimizə qarşı həbs, sürgün, işgəncə və soyqırımla cavab vermişlər. Rasist mahiyyətli bugünki dini hakimiyyət də azərbaycan türkündən dil haqqını almaqla əslində millətimizin milli dirçəliş tarixini durdurmağa çalışır. Onlar bilirlər ki, bir millətin öz milli mənliyini dərketmə prosesində dil ilkin və əsas amildir.

Güney Azərbaycan Milli Azadlıq Cəbhəsi (GAMAC) bəyan edir ki, Güney Azərbaycanda basqı altında yad dildə təhsil almağa məcbur edilimiş azərbaycan türkləri aparılan bu siyasətə kütləvi etirazlarla cavab verməli və pozulmuş hüqüqlarının bərpası uğrunda təşkilatlanmış formada sivil və demokratik mübarizəsini davam etdirməlidir. Biz bütün dünyaya göstərməliyik ki, milli, mənəvi və tarixi zənginliklərə sahib olan Azərbaycan türkü öz ana dilində təhsil almağa, azad, demokratik inkişafa layiq bir millətdir.

Güney Azərbaycan Milli Azadlıq Cəbhəsi (GAMAC) Beynəlxalq Təşkilatların və İnsan hüquqlarını müdafiə edən qurumların beynəlxalq hüquq normalarına əsaslanan qanunlar çərçivəsində Güney Azərbaycanda 35 milyon azərbaycan türkünün milli və insani hüquqlarının təmin edilməsi istiqamətində aktiv fəaliyyət göstərmələrini zəruri hesab edir.

GÜNEY AZƏRBAYCAN MİLLİ AZADLIQ CƏBHƏSİ