GünAzTv: Birləşmiş Ştatlarda səfərdə olan Azərbaycanın xarici işlər naziri Elmar Məmmədyarov BMT-nin Nyu-Yorkda keçirilən sammitində çıxış edib.

Minilliyin inkişaf məqsədlərinə həsr olunmuş sammitdə çıxış edən nazir beynəlxalq ictimaiyyətə Azərbaycanın yoxsulluq və xəstəliklərlə mübarizədə əldə etdiyi uğurlarından danışıb.

E.Məmmədyarov qeyd edib ki, Azərbaycanın təqribən 20 faiz torpaqlarının qonşu Ermənistan tərəfindən hərbi işğalının davam etməsinə və təxminən bir milyon qaçqın və məcburi köçkünün olmasına baxmayaraq, hökumət 2015-ci ilədək Minilliyin inkişaf məqsədlərinin yerinə yetirilməsi üzrə bütün öhdəlikləri icra edir.

Nazirin sözlərinə görə, son beş il ərzində Azərbaycanda iqtisadiyyatın presedentsiz artım tempi müşahidə olunur.

"İqtisadiyyatın neft sektorundan əldə olunan gəlirlər 2015-ci iləqədərki məqsədlərə çatmaq üçün lazım olan layihələrin maliyyələşdirilməsinə imkan verir. Hökumətin əsas vəzifəsi resursların bugünki və gələcək nəsillərin xeyrinə səmərəli və şəffaf istifadəsindən ibarətdir", - deyə Məmmədyarov bildirib.

O qeyd edib ki, respublikada xüsusilə də kimsəsiz və aztəminatlı ailələrdən olan uşaqların hüquqları və onların istedadlarının təşviqinə riayət olunmasına böyük diqqət yetirilir.

“Qadın məsələləri ilə bağlı milli plana gəldikdə isə, bir çox işlər artıq görülüb və bütün bunlar gender bərabərliyinin təmin edilməsi üçün hüquqi planda həyata keçirilib. Belə ki, Azərbaycanda qadınların orta və ali təhsil alması üçün hər bir şərait yaradılıb, məvaciblərdə bərabərlik mövcuddur, qərarların qəbul edilməsi prosesində qadınların iştirakı nəzərə çatpacaq dərəcədə artıb. Parlamentdə və dövlət strukturlarında qadınların sayında artım müşahidə olunur", - deyə Azərbaycanın xarici işlər naziri bildirib.

O həmçinin qeyd edib ki, Azərbaycanda tibbin inkişafı sahəsində ana və uşaq ölümlərinin səviyyəsinin azaldılması üçün bir çox işlər görülür: "Son beş il ərzində uşaq ölümlərinin tempi üç dəfə, ana ölümlərinin sayı isə iki dəfə azalıb", - deyə nazir bildirib.

Onun sözlərinə görə, HİV xəstəliklərinin sayının artım tempinin azaldılması istiqamətində də bir çox işlər görülür.

Minilliyin İnkişaf Məqsədləri nailiyyətləri barədə danışan Elmar Məmmədyarov qeyd edib ki, Azərbaycan meşə massivlərinin azaldılması məsələsini nəzarətə götürərək ekologiyaya xüsusi diqqət ayırır.

"Biz bir sıra infrastruktur layihələrə başlamışıq və hazırda həyata keçiririk. Bu, qonşu ölkələrin inkişafına da yardım göstərir", - deyə o əlavə edib.

Nazir xatırladıb ki, Azərbaycan region əhalisinin internet və telekommunikasiya sistemlərinə girişinə imkan verəcək birgə trans-avropa informasiya xətlərini reallaşdırmaq təklifi irəli sürüb.

Çıxışını başa vuran Azərbaycanın xarici işlər naziri BMT-də qəbul olunan qərarların praktiki öz həllini tapacağına ümid etdiyini bildirib.//Trend