GünAzTv: BMT-nin Nyu Yorkda yerləşən baş qərargahında təşkilatın Baş Məclisinin 65-ci sessiyası öz işinə başlayıb. Azərbaycanın bu sessiyadan gözlədikləri və planları barədə BMT-dəki daimi nümayəndəsi səfir Aqşin Mehdiyev AzərTAc-a müsahibə verib.

- Baş Məclisin açılan yeni sessiyasında üzv dövlətlər nələri diqqətdə saxlayacaqlar?

- Sessiya çərçivəsində davamlı inkişafa yardım, beynəlxalq sülhün və təhlükəsizliyin dəstəklənməsi, insan hüquqlarının təşviq edilməsi, humanitar yardımın göstərilməsi üzrə səylərin səmərəli əlaqələndirilməsi, ədalətə və beynəlxalq hüququn inkişafına yardım, tərk-silah, narkotiklərə nəzarət, cinayətkarlığın qarşısının alınması, beynəlxalq terrorizmlə mübarizə və digər məsələlər müzakirə ediləcək. Sentyabrın 20-22-də isə sessiya çərçivəsində Minilliyin İnkişaf Məqsədlərinə dair yüksək səviyyəli plenar iclas keçiriləcək. İclasın əsas məqsədi sonuncu dəfə 2005-ci ildə keçirilmiş görüşdən bu günədək olan vəziyyəti müzakirə etmək və 2015-ci ilədək görüləcək tədbirləri müəyyənləşdirməkdən ibarətdir.

- Azərbaycanı bu gündəlikdə duran hansı məsələlər yaxından maraqlandırır?

- Ölkəmiz BMT-nin üzvü olaraq, yuxarıda adları çəkilən bütün məsələlərə xüsusi diqqət yetirir və onların müzakirəsində yaxından iştirak edir. Eyni zamanda, bizim üçün ən vacib məsələ, şübhəsiz ki, Ermənistan tərəfindən Azərbaycana qarşı təcavüz və ərazilərimizin işğal edilməsi faktının gündəmdə saxlanılmasıdır. Bu məqsədlə təşkilat çərçivəsində, ötən sessiyalarda olduğu kimi, daimi nümayəndəlik tərəfindən məsələ ilə bağlı təşəbbüslər irəli sürüləcək, mütəmadi olaraq ikitərəfli və çoxtərəfli görüşlər keçiriləcək, Ermənistanın Azərbaycana qarşı işğalçılıq siyasəti, onun nəticələri, tarixi və hüquqi aspektləri barədə məlumatlar veriləcək.

- “Azərbaycanın işğal edilmiş ərazilərində vəziyyət”lə bağlı məsələnin başa çatan sessiyada müzakirə olunmaması xüsusilə erməni kütləvi informasiya vasitələrində müxtəlif cür yozulmaqdadır. Ölkəmizin bu haqda qərarının hansı məntiqdən irəli gəldiyini şərh edə bilərsinizmi?

- ATƏT-in Minsk qrupunun həmsədrləri aidiyyəti tərəflərlə apardıqları məsləhətləşmələr nəticəsində elan ediblər ki, cari il sentyabrın sonu-oktyabrın əvvəlində işğal olunmuş ərazilərdəki humanitar vəziyyətin öyrənilməsi məqsədilə regiona faktaraşdırıcı missiya səfər edəcək. Xoş məram, konstruktivlik mövqedən çıxış edərək, Azərbaycan tərəfi 64-cü sessiyanın plenar iclasının gündəliyində olan A/64/L.57 saylı qətnamə layihəsinin baxılmasının təxirə salınmasını, “Azərbaycanın işğal edilmiş ərazilərində vəziyyət” adlı bəndin isə Baş Məclisin 65-ci sessiyasının gündəliyinə salınmasını xahiş edib. Eyni zamanda, vurğulamaq lazımdır ki, layihədə missiyanın göndərilməsi əsas məsələlərdən olub. Bununla bağlı qərar konsensusla qəbul edilib.

- Bu həftə başlanan ümumi debatlarda Azərbaycanı təmsil edəcək nümayəndə heyətinin BMT-də iş cədvəli barədə nə deyə bilərsiniz?

- Qeyd etmək istərdim ki, ölkəmizin mənafelərinin qorunması, təşəbbüslərimizin irəlilədilməsi və onlara lazımi dəstəyin əldə edilməsi üçün BMT Baş Məclisinin 65-ci sessiyasının ümumi müzakirələri zamanı Azərbaycan nümayəndə heyətinin başçısı tərəfindən çıxış edilməsi, eyni zamanda, müzakirələr çərçivəsində ikitərəfli və çoxtərəfli görüşlərin və gərgin müzakirələrin keçirilməsi gözlənilir.