GünAzTv: Cəbhədəki atəş səslərinin sədası okeanın o tayına çatıb. ABŞ (Amerika Birləşmiş Ştatları) və Rusiyanın müdafiə nazirləri yaranmış vəziyyətdən narahatlıqlarını bildirdilər.

Dağlıq Qarabağ münaqişəsi bölgəsində vəziyyətin gərginləşməsi Pentaqonu da narahat edib. Sentyabrın 15-də ABŞ-a səfər edən Rusiya müdafiə naziri Serdyukovla Pentaqon rəhbəri Robert Geyts arasında danışıqlarda bu məsələnin müzakirə olunduğu xəbər verilir. Pentaqondan adının açıqlanmasını istəməyən yüksək rütbəli mənbə jurnalistlərə bildirib ki, Serdyukov və Geyts gündəmində İran, Qırğızıstan və digər aktual mövzularla yanaşı Dağlıq Qarabağ münaqişəsi zonasında atəşkəsin pozulması hallarının intensivləşməsi də olub. “Tərəflər Ermənistanla Azərbaycan arasında bu günlərdə baş vermiş döyüşlər barədə qısa diskussiya aparıblar. Biz Dağlıq Qarabağ münaqişəsi zonasında toqquşmaların qarşısını almaq üçün səyləri gücləndirməliyik” deyə, mənbə bildirib.

Xəbərlərə görə, Serdyukov Geyts tərəfindən Pentaqonun binasında qəbul edilib. O, ABŞ Müdafiə Nazirliyinin binasına daxil olan ilk Rusiya müdafiə naziridir. Daha sonra Birləşmiş Ştatların müdafiə naziri rusiyalı həmkarına hərbi gəminin göyərtəsində ziyafət verib. Amerika mətbuatı qeyd edir ki, Serdyukovun bu cür isti qarşılanması Rusiya ilə münasibətlərin keyfiyyətcə yeni mərhələdə olduğunu göstərir. Danışıqlar barədə açıqlama verən Pentaqon rəsmisi bildirib ki, tərəflər Qafqaza dair “geniş spektrdə məsələləri” müzakirə ediblər. “Geyts Gürcüstanla Rusiya arasında 2008-ci ilin avqustunda bağlanmış atəşkəsə riayət edilməsinin zəruriliyi barədə danışıb və Rusiya tərəfini regiondakı silahlı qüvvələri ilə bağlı daha şəffaf olmağa çağırıb” deyə, mənbə bildirib. Danışıqlardan sonra müdafiə nazirlərinin birgə brifinqi zamanı Pentaqon rəhbəri rusiyalı həmkarı ilə Qarabağ cəbhəsindəki vəziyyəti müzakirə etdiyini təsdiqləyib. “Biz münaqişə zonasında son vaxtlar artan toqquşmalardan narahatıq. Dağlıq Qarabağda zorakılığa son qoymaq üçün səyləri artırmaq lazımdır” deyə, Robert Geyts bildirib. Xatırladaq ki, ABŞ-ın Qarabağda vəziyyətin gərginləşməsindən və yeni müharibə təhlükəsinin yaranmasından ciddi narahatlıq keçirdiyini, hərbi əməliyyatların başlamasını əngəlləmək üçün münaqişə tərəflərinə təzyiqlərə başladığını “Yeni Müsavat” yazıb. Dövlət katibinin köməkçisi Tina Kaydenaunun regiona ezam edilməsinin səbəblərindən biri də məhz Qarabağda müharibə təhlükəsinin artması barədə Vaşinqtona çatan xəbərlər idi. ABŞ Dövlət Departamenti, Pentaqon və Mərkəzi Kəşfiyyat İdarəsi Qarabağ münaqişəsi zonasında vəziyyəti öz mənbələri vasitəsi ilə müntəzəm olaraq izləyir. Bu barədə Vaşinqtona hesabatlar göndərilir və çox güman ki, həmin hesabatlarda cəbhə xəttindəki vəziyyətə dair ictimaiyyətlərin bilmədiyi faktlar da yer alır. Başqa sözlə, əgər Pentaqonda dünyanın iki böyük dövlətinin hərbi nazirləri arasında görüşdə Qarabağda toqquşmalar müzakirə olunursa, deməli, bunun üçün ciddi səbəblər və narahatlıqlar mövcuddur. Robert Geytsin toqquşmalara son qoymaq üçün səylərin artırılması barədə sözlərindən isə bu nəticə çıxır: ABŞ Rusiyanın köməyindən də istifadə edərək tərəflərə, xüsusən də işğal olunmuş əraziləri azad etmək üçün hərbi yola əl atıla biləcəyi barədə müntəzəm olaraq bəyanatlar verən Azərbaycana təzyiqləri artırmaq fikrindədir. Baxmayaraq ki, cəbhə xəttindəki son insidentlər erməni qüvvələrinin təxribatçı həmlələri üzündən baş vermişdi. Dünən NATO da cəbhə xəttindəki insidentlərlə bağlı narahatlığını açıqlayıb. Alyansın Cənubi Qafqaz üzrə xüsusi nümayəndəsi, İrəvanda səfərdə olan Robert Simmons bildirib ki, Qarabağ münaqişəsi zonasında baş vermiş son qanlı insidentlər hərbi bloku narahat edir. Diplomat atəşkəsin qorunmasının vacibliyi haqda danışıb və deyib ki, münaqişənin həlli beynəlxalq hüququn üç fundamental prinsipinə-ərazi bütövlüyünə, xalqların öz müqəddəratını təyin etməsinə və güc tətbiq edilməməsinə əsaslanmalıdır. Ermənistan KİV-lərinin məlumatlarına görə, Simmons jurnalistlərin suallarına cavab olaraq rəsmi Bakının Qarabağ məsələsini BMT-nin gündəminə çıxarmasına, daha sonra qətnamə layihəsini geri çəkməsinə də münasibət bildirib. O deyib ki, Bakı əvvəllər də belə addımlar atıb. NATO diplomatının sözlərinə görə, hər bir ölkə BMT-də məsələ qaldırmaq üçün suveren hüquqa malikdir, ancaq alyans Qarabağ münaqişəsinin nizamlanmasında Minsk Qrupu formatını dəstəkləyir. Yeni Musavat