Türk Ölkələrinin Əməkdaşlıq Şurası yaradıldı

SON XƏBƏRLƏR

Türk Ölkələrinin Əməkdaşlıq Şurası yaradıldı

2021.10.20, 07:36

Gunaz.tv

GünAzTv: Sentyabrın 16-da İstanbulda, “Çırağan” sarayında Türk ölkələrinin dövlət başçılarının X zirvə toplantısı keçirildi.

Toplantıda Azərbaycan prezidenti İlham Əliyev, Türkiyə prezidenti Abdulla Gül, Qazaxıstan prezidenti Nursultan Nazarbayev, Türkmənistan prezidenti Qurbanqulu Berdiməhəmmədov, Qırğızıstanın keçid dövrü prezidenti Roza Otunbayeva iştirak ediblər. Naxçıvanda keçirilən sonuncu zirvə görüşündə qərara alınmışdı ki, 2010-cu ilin sentyabrında İstanbulda keçiriləcək zirvə toplantısında Türk Ölkələrinin Əməkdaşlıq Şurası təsis olunsun.

Sentyabrın 16-da İstanbulda dövlət başçıları zirvə toplantısının bu və digər məsələlərlə bağlı yekun sənədini imzalayıblar, növbəti zirvə toplantılarının 2011-ci ildə Qazaxıstanda, 2012-ci ildə Qırğızıstanda keçirilməsini qərara alıblar və Türk Ölkələrinin Əməkdaşlıq Şurasının İstanbulda yerləşəcək Katibliyinə türkiyəli diplomat Xəlil Akıncını rəhbər təyin ediblər. Tədbirdə dövlət başçıları çıxış ediblər, TÜRKSOY-un və TürkPA-nın fəaliyyətlərinə dair məlumatları dinləyiblər.

Abdulla Gül çıxışında deyib ki, Türk Ölkələrinin Əməkdaşlıq Şurası beş bölmədən ibarət olacaq (Dövlət Başçıları Şurası, Xarici İşlər Nazirləri Şurası, Əməkdar Məmurlar Komitəsi, Ağsaqqallar Şurası və Katiblik). Türkiyə prezidenti bu qurumun ona daxil olan ölkələrin birgə maraqlarına xidmət edəcəyini vurğulayıb: “Ötən il Naxçıvanda keçirilən zirvə toplantısında qərara gəldiyimiz önəmli məsələlərdən biri elə Türkdilli Ölkələrin Əməkdaşlıq Şurasının yaradılması idi. Beş bölmədən ibarət olacaq şura qardaş ölkələr arasında əlaqələrin gücləndirilməsi üçün sistemli fəaliyyət göstərəcək. Şuranın babalarımızdan miras aldığımız dil, mədəniyyət və tarixi qorumaq, keçmiş irsi gələcək nəsillərə ötürmək üçün mühüm işlər görəcəyinə ümidvaram”. Abdulla Gül türk ölkələrini arasında əzəli və ədəbi qardaşlıq bağlarının nümunəvi işbirliyinə çevriləcəyinə güvəndiklərini deyib. O qeyd edib ki, yeni qurum çərçivəsində türk ölkələrinin maraqlandıran bütün məsələlər üzərində məsləhətləşmələr aparılacaq. Türk ölkələri dövlət başçılarının X zirvə toplantısında müzakirələr türk dilinin müxtəlif ləhcələrində, rus və ingilis dillərində keçib. Türk ölkələri dövlət başçılarının ilk zirvə görüşü 1992-ci ildə Ankarada, sonrakı toplantılar 1994-cü ildə İstanbulda, 1995-ci ildə Bişkekdə, 1996-cı ildə Daşkənddə, 1998-ci ildə Astanada, 2000-ci ildə Bakıda, 2001-ci ildə İstanbulda, 2006-cı ildə Antalyada, 2009-cu ildə isə Naxçıvanda olub.

GUNAZ.TV

SON XƏBƏRLƏR