İki qonşu arasında münasibətlər gərginləşə bilər

SON XƏBƏRLƏR

İki qonşu arasında münasibətlər gərginləşə bilər

2021.10.20, 07:36

Gunaz.tv

GünAz TV: “İran ətrafında vəziyyətin gərginləşməsi təbii olaraq Bakı və Tehran arasında münasibətlərə də təsir göstərib. Lakin bununla belə İranla bağlı yayılan hər hansı məlumata həssas yanaşmaq lazımdır”.

Bu sözləri politoloq (siyasi şərhçi) Sülhəddin Əkbər son vaxtlar Azərbaycan-İran münasibətlərindəki gərginliyi “Azadlıq”a şərh edərkən bildirib.

Politoloq deyib ki, hazırda İranla Qərb psixoloji (rəvani) savaş mərhələsindədir. Belə bir vəziyyətdə təbii ki, Azərbaycanın İranın rəqibləri, xüsusilə İsraillə sıx əməkdaşlıq etməsi Tehranı qıcıqlandırır: “Lakin nəzərə almaq lazımdır ki, bu psixoloji savaşda İranın normal münasibətlərdə olduğu ölkələrlə arasını vurmaq üçün bəzi dezinformasiyalar (yalnış məlumat) yayılır. Ona görə də bu məsələdə bir qədər ehtiyatlı olmaq dərhal nəticə çıxarmaq doğru deyil. Məsələn, İsrailin Azərbaycandakı kəşfiyyat bürosu İranın ölkəmizdəki fəaliyyəti ilə bağlı kifayət qədər məlumatlara malikdir. Lakin İsrailin marağı yoxdursa, bu məlumatlar Azərbaycana ötürülmür. Maraq varsa, bu məlumatlar bir qədər də şişirdilmiş şəkildə Bakıya təqdim edilir”.

Bu arada “Yeni Müsavat” qəzeti İsrail mediasına istinadən məlumat yayıb ki, İran agentlərinin bu ölkənin Azərbaycandakı səfiri Mixail Loven-Lotemi öldürmək planı var. Bakıdakı yəhudi səfirə qarşı İranın sui-qəsd planlarının olduğunu İsrail xüsusi xidmət orqanları da təsdiqləyir. Xəbərlərdə qeyd edilir ki, bu günlərdə MTN (Milli Təhlükəsizlik Nazirliyi) tərəfindən həyata keçirilən əməliyyat zamanı saxlanılan Rasim Əliyev və Əli Hüseynov adlı şəxslər Bakıdakı İsrail dini məktəbi “Habad Or-Ənvər”in iki müəllimi ilə yanaşı səfiri də vurmaq tapşırığı alıb.

Digər xəbərə görə isə MTN-in Bakıda yəhudi məktəbinin müəllimlərinə qarşı sui-qəsd planının qarşısını almasının ardınca İsrail gömrükdə təhlükəsizliyin gücləndirilməsində kömək göstərmək barədə Azərbaycanla sənəd imzalayıb.

Həmçinin Ilham Əliyevlə Davosda görüşən İsrail prezidenti Şimon Peres Azərbaycanda Israil ictimai xadimlərinə qarşı törədilməsi planlaşdırılan terror aktının (əməl) qarşısının alındığına görə prezident Ilham Əliyevə təşəkkür edib.

Bütün bunlar Azərbaycanla İsrail arasında əməkdaşlığın artıq müttəfiqlik şəkli almasının bir addımlığında olduğunu göstərir. Bu da təbii ki, Azərbaycan-İran münasibətlərində gərginliyin qarşıdurma səviyyəsinə keçməsini şərtləndirə bilər. Azadlıq qəzeti

GUNAZ.TV

SON XƏBƏRLƏR