GünAz TV: Dünən İsrailin əksər qəzetləri, o cümlədən “Haaretz”, “The Jerusalem Post”, “Maariv” və digərləri bu xəbərə yer veriblər.

ABŞ (Amerika Birləşmiş Ştatları) və İsrail xüsusi xidmət orqanları İranın Azərbaycanda Amerika və yəhudi maraqlarına qarşı terror hücumları təşkil etmək cəhdlərinə cavab olaraq Azərbaycana diqqəti artırıb.

Bu arada Bakıdakı qaynaqlara istinadən İsrail mediası xəbər yayıb ki, İran agentlərinin bu ölkənin Azərbaycandakı səfiri Mixail Loven-Lotemi öldürmək planı var. Xəbər əvvəlcə Azərbaycan xüsusi xidmət orqanlarındakı mənbələrə istinadən bəzi rusdilli İsrail saytlarında yer alıb. Dünən isə İsrailin əksər qəzetləri, o cümlədən “Haaretz”, “The Jerusalem Post”, “Maariv” və digərləri bu xəbərlərə yer veriblər. Bakıdakı yəhudi səfirə qarşı İranın sui-qəsd planlarının olduğu İsrail xüsusi xidmət orqanlarınca da təsdiqlənir. Xəbərlərdə qeyd edilir ki, bugünlərdə MTN (Milli Təhlükəsizlik Nazirliyi) tərəfindən həyata keçirilən əməliyyat zamanı saxlanılan Rasim Əliyev və Əli Hüseynov adlı şəxslər Bakıdakı İsrail dini məktəbi “Habad Or-Ənvər”in iki müəllimi ilə yanaşı səfiri də vurmaq tapşırığı alıb. Bildirilir ki, Azərbaycan xüsusi xidmət orqanları həmin şəxslərin İsrail səfirinə qarşı sui-qəsd həyata keçirmək barədə tapşırıq almasını araşdırır.

İsrail hökumətinin Anti-Terror Bürosu isə bəzi ölkələrdə, o cümlədən Azərbaycanda yəhudilərə qarşı terror təhlükəsinin mövcud olduğuna dair xəbərdarlığını yeniləyib. Büro bu ərəfədə İsrail vətəndaşlarını Bakıya səfərlərini təxirə salmağa çağırır. Bakıdakı səfirliyin təhlükəsizliyi daha da gücləndirilib, bəzi məlumatlara görə, bu məqsədlə İsraildən xüsusi təyinatlı agentlər göndərilib. Xəbərdarlığa görə, İran xüsusi xidmət orqanları və “Hizbullah” bu təşkilatın hərbi qanadının nüfuzlu lideri İmad Muqniyənin öldürülməsinin ildönümü ərəfəsində qisas əməliyyatları həyata keçirmək niyyətindədir. 2008-ci ildə İran kəşfiyyatı “Hizbullah” vasitəsilə Muqniyənin öldürülməsinə qisas olaraq Bakıdakı İsrail səfirliyini partlatmaq planı hazırlamışdı.

İsrail ordusunun Baş Qərargah rəisi Benni Gantz də bir sıra ölkələrdə yəhudilərə qarşı terror hücumları təhlükəsinin mövcud olduğunu təsdiqləyib. O deyib ki, hazırda İsrailin düşmənləri fəallaşıblar və müxtəlif ölkələrdə öz planlarını həyata keçirməyə cəhd edirlər. General bununla bağlı “Hizbullah”a sərt xəbərdarlıq edib: “Biz onlara məsləhət görürük ki, İsrailin qətiyyətini sınamaq fikrinə düşməsinlər”. Bildirilir ki, İsrail Müdafiə Nazirliyi xarici ölkələrdəki İsrail hədəflərinə və nümayəndəliklərinə hücum təhlükəsi ilə bağlı yüksək hazırlıq vəziyyəti elan edib. Lakin bu hazırlığın hansı tədbirləri nəzərdə tutduğu açıqlanmır. “Biz ”Hizbullah"ın və digər düşmən elementlərin (ünsürlərin) İsraildən uzaqlarda vəhşi terror aktları (əməlləri)  həyata keçirmək cəhdlərinin şahidi oluruq, bildirirəm ki, bu cəhdlərin qarşısı qətiyyətlə alınacaq" deyə, general Gantz bildirib.

ABŞ-ın (Amerika Birləşmiş Ştatları) Azərbaycandakı səfirliyi də Milli Təhlükəsizlik Nazirliyinin Bakıda xarici vətəndaşlara qarşı terror aktının qarşısının alınması barədə məlumatından sonra öz vətəndaşlarına xəbərdarlıq edib. Müvafiq xəbərdarlıq ABŞ-ın Azərbaycandakı səfirliyinin saytında yerləşdirilib. Səfirlik ölkəmizdəki vətəndaşlarına xatırladır ki, ABŞ əleyhinə və Amerikanın Azərbaycandakı xarici siyasət maraqları əleyhinə təhlükə qalmaqdadır: “Azərbaycandakı ABŞ vətəndaşları, xüsusilə Qərb və İsrail icmaları ilə əlaqəli olan ictimai yerlərdə sayıq olmalıdır”. ABŞ səfirliyinin mətbuat katibi Kis Bin APA-nın “xəbərdarlıqla əlaqədar səfirlikdə təhlükəsizlik tədbirləri gücləndirilibmi”, sualına cavab olaraq bildirib ki, bütün müvafiq təhlükəsizlik tədbirləri görülür.

Digər xəbərə görə isə MTN-in Bakıda yəhudi məktəbinin müəllimlərinə qarşı sui-qəsd planının qarşısını almasının ardınca İsrail gömrükdə təhlükəsizliyin gücləndirilməsində kömək göstərmək barədə Azərbaycanla sənəd imzalayıb. Məlumata görə, İsraillə Azərbaycan arasında gömrük sahəsində əməkdaşlığa dair sənədi Dövlət Gömrük Komitəsinin sədri Aydın Əliyevlə İsrail səfiri Mixail Lavon- Lotem imzalayıblar. Əməkdaşlığın nədən ibarət olacağı məlum deyil, lakin ehtimal ki, söhbət Azərbaycanın gömrük postlarında qaçaqmalçılığın qarşısının alınmasında İsrailin köməyindən istifadədən gedir. MTN-in məlumatında bildirilirdi ki, sui-qəsd üçün silahlar və partlayıcı maddələr İrandan Azərbaycana gömrükdən gizli yollarla keçirilib. Bu da Azərbaycanın İranla sərhəd gömrük postlarında təhlükəsizliyə dair suallar yaradırdı. Digər tərəfdən, Azərbaycan üzərindən daşınan narkotiklərin böyük hissəsi İrandan keçirilir. Şübhə yoxdur ki, Bakının gömrük sahəsində İsraillə əməkdaşlığa dair yeni razılaşma imzalaması İranın qəzəbini artıracaq. Azərbaycan hakimiyyəti də son vaxtlarda ilk dəfə İranın ünvanına sərt çıxışlar etməyə başlayıb. Rəsmi dövlət qəzeti “Azərbaycan” İran əleyhinə sərt məqalə dərc edib, bu ölkənin Azərbaycanda stabilliyi pozmaq cəhdlərinin cavabsız qalmayacağı vurğulanıb. Belə cavablardan biri də İsraillə təhlükəsizlik sahəsində əməkdaşlığı daha da genişləndirməkdir.

İran səfirliyi isə “Yeni Müsavat”a açıqlamasında, MTN-in Bakıda yəhudi məktəbinin müəllimlərinə qarşı sui-qəsd planının İranla bağlı olması iddiasını belə qiymətləndirib: “İranın Azərbaycandakı səfirliyinin mətbuat xidməti bu məsələnin İranla əlaqələndirilməsini qəti surətdə rədd edir və bildirir ki, bu məsələ sionistlərin iki ölkə - İran və Azərbaycan arasındakı əlaqələrə xələl gətirmək məqsədi güdən bir provokasiyasıdır (fitnədir)”. Yeni müsavat