Bakıda bənzərsiz şəhərcik salınacaq

SON XƏBƏRLƏR

Bakıda bənzərsiz şəhərcik salınacaq – FOTO / VİDEO

2021.10.20, 07:36

Gunaz.tv

GünAz TV: Bakı arxipelaqlarının (məcmə-ul cəzayir, takımadalar) ən böyüyündə – Böyük Zirə (Nargin) adasında turizm layihəsi hazırlanıb. Bu ada paytaxtdan 10, 5 kilometr aralıda yerləşir.

Layihəyə əsasən, ada bir neçə zonaya (məntəqə) ayrılacaq və orada müxtəlif flora (giyah, bitki) və faunaya (canəvər) malik parkla, qonaqların qarşılanması üçün buxta və otellər salınacaq.

Burada buxtaya gəlib-gedən gəmilərə nəzarət məqsədilə hərbi limanın da fəaliyyət göstərməsi nəzərdə tutulub. Layihənin rəhbəri, “AzExCo” şirkətinin direktoru Rasim Babakişiyev bu barədə xəbər verib.

Birinci zona digərlərindən süni kanalla ayrılacaq. Daim güclü küləklərin əsdiyi ikinci zonada isə, qala divarları İçərişəhəri xatırladan arxasında köhnə üslublu evlərdən ibarət şəhərcik yaradılacaq. Burada “Karvansara” adlı otelin də tikilməsi nəzərdə tutulur.

Qədim şəhərdəki bütün evlərin birinci mərtəbəsində restoranlar, mağaza və muzeylər yerləşəcək. Şəhərciyin mərkəzində Tolerantlıq (xoşgörü) meydanı salınacaq və burada məscid, kilsə və sinaqoq yanaşı fəaliyyət göstərəcək.

Birinci dünya müharibəsi illərində adada əsir saxlanılan 10 min türk əsgər və vətəndaşın, Stalin təqibləri zamanı bura sürgün olunan şəxslərin qalıqları da salınacaq qardaşlıq qəbristanında dəfn olunacaq.

Adada gənclər üçün zona da yaradılacaq, burada diskoteka, konsert və tamaşaların verilməsi üçün amfiteatrın da olması nəzərdə tutulur. Amma artıq səs-küy olmasın deyə bu zonanın “qədim şəhərdən” aralıda salınması planlaşdırılır.

Burada yaxt-klub (badbani qayıq başqahı), ticarət mərkəzi, poliklinika, məktəb fəaliyyət göstərəcək. Sahilin 800 metrliyində isə, çimərlik yaradılacaq.

Memarın sözlərinə görə, adada böyük dövlət tədbirlərinin, sammitlərin (zirvə görüş) də keçirilməsi nəzərdə tutulub. Bunun üçün müvafiq şərait yaradılacaq.

Layihənin reallaşması 3 milyard manata başa gələcək. İdeya artıq xarici iş adamlarında da maraq doğurub, amma layihəni realizə etmək üçün ilk növbədə onun dövlət rəhbərliyi tərəfindən təsdiqlənməsi vacibdir.

GUNAZ.TV

SON XƏBƏRLƏR