GünAz TV: Güney Azərbaycan Milli Azadlıq Cəbhəsi (GAMAC) keçirdiyi ll Qurultayda Urmu Gölü il bağlı Qətnamə qəbul edib.

Qətnamədə qeyd olunur:  

“Urmu Gölünü məqsədyönlü qurudulmasına Azərbaycan türkünün kütləvi etirazlara baxmayaraq,  İran rejimi Azərbaycan türk milləti əleyhinə yeritdiyi siyasətində israrlıdır. Qış və yaz fəsillərində Urmu gölünü canlandıran çayların qarşısında qurulmuş su bəndləri bu suların gölə tökülməsinin qarşısını alır. Məlumatlara görə, bu il yağıntının çox olması və su bəndlərinin arxasında üç milyard m³ su yığıldığı halda Urmu gölünə gərəkli miqdarda su axmazsa, bu, gölün növbəti yazda tam quruması ilə nəticələnəcək. Əvvəllər göldə suyun ortalama dərinliyi 16 metr idisə, artıq bugün suyun ortalama dərinliyi 2 metrə enib.

Əvvəlki illərlə müqayisədə son iki ildə bölgədəki yağıntı normadan daha artıq olduğu halda rejim məsulları Urmu gölünün qurudulmasını  doğal quraqlığın nəticəsi kimi göstərsələr belə, Azərbaycan milləti məsələnin hansı istiqamətdə getdiyini və bunu fars hakimiyətinin anti-azərbaycan siyasəti kimi dəyərləndirir. Urmu gölünün qurumasına bu gölə axan çaylar önündə qurulmuş su bəndləri və Təsərrüfat və Su İdarəsi  tərəfindən 20 mindən artıq dərin su quyularının qazılmasına icazə verməsidir.

1979-cu il İran İslam Cumhuriyyəti qurulduqda Azərbaycan milləti müxalifət mövqe tutaraq Vilayəti-fəqihə səs verməmişdi. Fars hakimiyyəti   Azərbaycanda sənət və ticari gəlişmələrin qarşısını almağa və Azərbaycan əleyhinə siyası basqılar düzənləməyə çalışsa da, Azərbaycandakı müxalifət ocaqlarını söndürə bilməmişdi. Demək, bugün də şovinist rejim Urmu gölünü qurutmaq və azərbaycanlıların sıx yaşadıqları bölgəni şoranlığa çevirməklə, onları öz ata-baba yurdlarından köçürməyə çalışmaqla Azərbaycandakı milli azadlıq hərəkatını zəiflətmək istəyir. Urmu gölünün qurumasıyla on milyard m³ duz və ağır dəmir tozları qasırğa və yel ilə bu yerləri bürüyərək bütün Azərbaycan və eləcə də qonşu ölkələrin ərazilərini şoranlığa çevirmək gücündədir. Bu təhlükə durmadan gündən-günə artmaqdadır.

Urmu gölünün qurumasının hansı nəticələr verə biləcəyini dərk edən Azərbaycanın qeyrətli oğul və qızları iki ildə rejimin bu siyasətinə etdikləri etirazlarıyla Urmu gölünü xilas etməkdə qərarlı olduqlarını göstərməkdədirlər. Rejim tərəfindən onlara qarşı tətbiq edilən əsassız basqı və işgəncələri, həbslər və sürgünlər Azərbaycan millətinin qeyrətli oğul və qızlarını tutduqları muqəddəs yollarından çəkindirmir. Onlar Azərbaycanımızın xilası üçün canlarından keçməyə və milli demokratik mübarizələrində fars hakimiyyətinin anti-azərbaycan siyasətini məğlubiyyətə uğratmaqda qərarlıdırlar.

Qeyd etmək lazımdır ki, Urmu gölünün quruması Asiyanın günbatanında böyük quruluq çöllərinin yaranmasına səbəb olacaq. Dünya ictimaiyyəti bu məsələnin hansı aşamada olduğunu bildiyi üçün Birləşmiş Millətlər  Təşkilatının Bərpaetmə ofisi və ətraf mühitin qorunması üzrə Maddi Yardım Fondu 2011-ci ilin sonuna qədər İrandakı göl və göməçələrin durumuna dair İran hakimiyətindən bilgi və məlumat verməsini tələb etmişdi. Verilmiş möhlət artıq sona çatdığı üçün bu qurumlar İran rejiminə maddi  və texniki yardımlarını dayandıraraq İranı ətraf mühitə ziyan verən ölkələr siyahısına salacaqlar.

Güney Azərbaycan Milli Azadlıq Cəbhəsi (GAMAC) Urmu gölünün xilası doğrultusundakı fəaliyyətlərə dəstək olaraq dünyadakı Beynəlxalq İcmalarının Ətraf mühit üzrə sorumlularını, eləcə də ətraf mühitin qorunması ilə məşgul olan  qurum və cəmiyyətləri Urmu Gölünün acınacaqlı vəziyyəti ilə bağlı daha çox məlumatlandıracaq və iran rejimini dünya dövlətlərinin və beynəlxalq qurumların təzyiqi ilə Urmu gölü məqsədyönlü qurutma siyasətindən geri oturtmağa çalışacaq.

Cəbhə Azərbaycan milli hərəkatı və milli təşkilatları Urmu Gölünün müdafiəsi üçün işbirliyinə çağıraraq bu istiqamətdə Azərbaycan milli hərəkatında təmsil olunan bütün qurum və təşkilatlarla işbirliyi aparacağını azərbaycan ictimaiyyətinin diqqətinə çatdırır.”

GÜNEY AZƏRBAYCAN MİLLİ AZADLIQ CƏBHƏSİNİN ll QURULTAYI

Almanya, Köln şəhəri, 07.01.2012