GünAz TV: ABŞ (Amerika Birləşmiş Ştatları) Gürcüstanın bir sıra ərazilərində, o cümlədən azərbaycanlıların kompakt yaşadığı Marneuli ərazisində məxfi aerodrom (hava limanı) tikib.

Məqsəd yaxın vaxtlarda İrana qarşı intensiv (şiddətli) hərbi əməliyyatların gerçəkləşdirilməsi üçün arxa baza (payqah) yaratmaqdır. Bu diqqətçəkən bəyanatı gürcü yazıçısı, publisist (yazıçı-jurnalist) və ictimai xadim, müxalifət təmsilçisi Elizbar Cavelidze "Kviris xronika" ("Həftənin xronikası") qəzetinə müsahibəsində bəyan edib.

Onun sözlərinə görə, prezident Saakaşvilinin son aylar Gürcüstanın bütün ərazilərini gəzməsinin səbəbləri bəllidir: "Hər yerdə 20 yerlik xəstəxanalar və hava limanları tikilir. Bu, körfəzdə gözlənilən müharibəyə hazırlıqdır. 20 yerlik bu xəstəxanalar Amerika layihəsidir. körfəzdə ABŞ (Amerika Birləşmiş Ştatları) və İran arasında böyük müharibə başlayır və 5 milyard dollar bu 20 yerlik hərbi hospitalların tikintisinə ayrılıb. Bu hospitallar əsasən Amerika pulları hesabına tikilir. Kulevidə sualtı gəmilər üçün limanın (bəndər) tikintisi əbəs yerə deyil. Lazika isə Amerika hərbi şəhərciyi olacaq. Artıq Marneulidə məxfi aerodrom tikilib".

"İranla hərbi münaqişə başlayan zaman Tehran Amerikanın hərbi obyektlərinə (təsisat) raketlər buraxacaq. O zaman ölkəmizi kim müdafiə edəcək?", - deyə E.Cavelidze bəyan edib.

Onun ehtimalına görə, "Saakaşvili ona nail olacaq ki, Rusiya Kulevi və Anaklini Gürcüstandan alacaq və bütün Sameqrelo regionu (bölgə) sual altında qalacaq". Milaz.info portalının məlumatına görə, Gürcüstanda hospital sektorunun (bəxş, bölüm) inkişafı layihəsi çərçivəsində tibb-sığorta şirkətləri ölkənin regionlarında 150 yeni xəstəxana tikəcək. 2011-ci ilin dekabr (December) ayı ərzində Gürcüstanın bir sıra rayon mərkəzlərində 30-dan artıq yeni xəstəxana və tibb mərkəzinin açılışı olub. Bu arada isə İrana hərbi müdaxilə üçün yeni əsas yaranıb. Belə ki, ABŞ, Fransa və Britaniya İranı beynəlxalq qanunları pozaraq dağ altında yüksək səviyyədə uranı zənginləşdirməyə başlamaqda ittiham edir. Beynəlxalq Atom Enerjisi Agentliyi yanvarın (January) 9-da təsdiqləyib ki, İran Tehranın 150 km-də Fordoda yeraltı nüvə obyektində (atom təsisatı) uranı 20 faizə qədər zənginləşdirir. Məlumatda deyilir ki, bu səviyyə kifayət edir ki, zənginləşdirilmiş uran döyüş sursatına çevrilsin. Fransa Xarici İşlər Nazirliyi yaydığı bəyanatda xəbərdarlıq edir ki, müttəfiqləri ilə birgə İrana qarşı "intensiv ciddi ölçü" götürə bilər.

Məsələ daha çox İsraili narahat edib. Elə bu səbəbdən İsrail, İranda nüvə silahı yaranacağı təqdirdə, "xarici siyasi ssenari" hazırlayacağını bildirib. İsrailin Milli Təhlükəsizlik Məsələləri üzrə Tədqiqat İnstitutunun ekspert (karşünas) qrupu tərəfindən hazırlanan hesabatda bu məsələyə geniş toxunulub. Təl-Əvivin Tehrana qarşı əsas xarici siyasət xəttinin nüvə silahının yaradılmasına əngəl törətmək olmasına baxmayaraq, bu hesabat belə ehtimalları istisna etməyən sabiq kəşfiyyat rəisləri və İsrailin İrandakı sabiq səfirlərinin sifarişi ilə hazırlanıb. Sənədə əsasən, İran alimləri nüvə silahını yaradıb, onu uğurla sınaqdan keçirməyə nail olsalar, Yaxın Şərqdəki siyasi qüvvələr arasında genişmiqyaslı yenidən paylaşma baş verəcək. Ekspertlərin fikrincə, Vaşinqton Qüdsə hərbi ittifaq təklif edəcək, bununla yanaşı, İsraili İrana qarşı cavab tədbirləri görməməyə çağıracaq. Rusiya regionda nüvə silahının yayılmasının qarşısını almaq məqsədi ilə ABŞ-la ittifaqa səy göstərəcək. Səudiyyə Ərəbistanı, çox güman ki, öz nüvə proqramını işə salacaq. Hesabat tərtibatçıları bu məlumatları yuxarıda adı çəkilən ölkələrin xarici siyasətinə əsasən edib.

İranda nüvə silahı yarandıqdan sonra ölkə hakimiyyəti bir sıra təxribat mahiyyətli tələblərlə çıxış edə bilər, məsələn, ölkə sərhədlərinin genişləndirilməsi və ya körfəz regionunda Amerika hərbi qüvvələri və vasitələrinin olmasının qadağan olunması.

"Biz güman edirik ki, İran nüvə silahından iri dövlətlərlə mübahisələrdə ciddi arqument (faktor, istidlal) kimi istifadə edəcək. Ehtimal ki, İran öz mövqelərini möhkəmləndirmək üçün rəqibinə nüvə zərbəsi endirmək kimi təhdidə əl ata bilər" - deyə hesabatda bildirilir.

Amerikanın tanınmış siyasi şərhçisi Ksandra Keydenin fikrincə isə, qeyri-sabit cəmiyyətlərin əlində nüvə silahının olması Qərb liderlərinin yuxusunu qaçırıb: "Haradasa nüvə hücumu olsa, kimin məsuliyyət daşıdığını bilmək çətin olacaq. Lap 1914-cü ildə olduğu kimi. O zaman aylarla davam edən məsələni bir dəqiqənin hökmü əvəz etdi, müxtəlif ölkələr çalışırdı ki, düşmənlərindən əvvəl zərbə endirsin. İranda rejim dəyişsə belə, Qərb ilə düşmənçilik qalacaq. Ölkəni başqa kursla idarə edəcək bir lider olmadığı halda İranla ABŞ arasında yavaş-yavaş artan gərginlik necə səngiyəcək? Bunu təsəvvür etmək çətindir". Tahir TAĞIYEV / Bakı-xəbər