GünAzTv: Rusiyanın məşhur jurnalistlərindən biri, tanınmış şərhçi Artyom Yefimov Dağlıq Qarabağdakı separatçı rejimin yalanlarınıa şahid olandan sonra onu Xankəndidən qovublar. Daha doğrusu, Ermənistandan Dağlıq Qarabağa adi turist təki yollanmış Yefimov Ağdama gedərək oranın viran edildiyini görəndən sonra "qəflətən" Xankəndidəki rejimin qəzəbinə gəlib.    "Dağlıq Qarabağda məni, qədim erməni məbəd memarlığının pərəstişkarını əsasən Qandzasar və Dadivank monastırları maraqlandırırdı. Fotoreportyor qismində Dnestryanı bölgə, Cənubi Osetiya və Abxaziyanı dolaşmış dostum Maks isə dünyaın heç bir dövlətinin tanımadığı və deyəsən, tanımaq fikrində olmadığı Dağlıq Qarabağın həyatı ilə ilgilənirdi.    Lakin məqsədlərimizə çata bilmədik: bizi Dağlıq Qarabağdan kənara atdılar", - A.Yefimov yazıb.    Sentyabrın 12-də dostu, fotoreportyor Maks ilə birlikdə Ermənistanın Gorus şəhərindən "Qazel" mikroavtobusu ilə Kəlbəcərə daxil olan rusiyalı jurnalistlər özlərinin turist olduqlarını desələr də, onlardan "giriş vizası" istəyiblər.    Ertəsi gün isə onlar Dağlıq Qarabağı gəzməyə çıxıblar və Xankəndidən yarımsaatlıq yoldakı Ağdama yollanıblar.    Artyom Yefimov yazır: "Ağdam azərbaycanlıların şəhəridir və burada 50 min nəfər yaşayırdı. 1993-cü ilin yayında, daxili çəkişmələr Azərbaycanın silahlı qüvvələrini az qala iflic vəziyyətinə salanda ermənilər hücuma keçərək bir ay davam edən döyüşlərdən sonra şəhəri aldılar. Sonralar BMT başda olmaqla, bütün beynəlxalq təşkilatlar Ağdamın ermənilər tərəfindən işğal olunduğunu bəyan etdilər.    Deyəsən, Ağdam çox gözəl şəhər olub. Orada qalmış binaların xarabalıqlarında yaşıllıq içində batan şərq şəhərinin aramı hiss olunur. Orada ağsaqallar kölgəli küçələrdə oturub çay içir, nərd oynayardılar. Nar demişkən: indi Ağdamda nar ağacları yaman bar gətirib.    Sonra Ağdam məscidinə çatdıq. Əsr yarım yaşı olan bu məscid deyəsən, şəhərdə darmadağın olmamış yeganə tikilidi. Onun mavi kaşılarla bəzənmiş iki minarəsi uzaqdan görünür.    Minarələrdən birinə çıxdıq və gördüyümüz mənzərə bizi dəhşətə gətirdi, hər tərəfdə göz işlədikcə xarabalıqlar vardı. Gözəl şəhər ürəksıxan, vəhşət sayan xarabazara döndərilib. İndi burada cəmi 5 erməni yaşayır. Onlar bizi qarpıza qonaq etdilər və su təklif edə bilmədiklərinə görə üzr istədilər. Dedilər ki, su qurtarıb, təzə suyu səhər gətirəcəklər. Böyük bidon üçün $10 verirlər. Binaların xarabalıqları arasında inəklər dolaşır. Ağdamda üç saat keçirəndən sonra yola çıxdıq və hər şey də onda başlandı".    A.Yefimov bildirir ki, onları ilk əvvəl özünü "Dağlıq Qarabağın Milli Təhlükəsizlik Xidmətinin zabiti" kimi təqdim edən Leonid Arustamyan saxlayıb.    O, Ağdamın "mühafizə edilən qapalı zona" olduğunu deyib.    Sentyabrın 14-də Dağlıq Qarabağın "Xarici İşlər Nazirliyi"nə çağırılan rusiyalı jurnalistlərə bildiriblər ki, onlar yerli qanunları pozublar və buna görə də deportasiya ediləcəklər. Sonra jurnalistlərin fotoaparatları ilə fləş yaddaş kartları əllərindən alınıb, oradakı nar budağının fotosu istisna olmaqla, bütün şəkillər silinib.    "Siz bura gələndə niyə dərhal Ağdama getdiniz? Yox ki, monastırlara, minillik ağaclara baxaydılar", - qarabağlı "diplomatlar" donquldanıblar.    A.Yefimovun sözünə görə, belə davranışdan sinirləniblər və Moskvadakı bir sıra kütləvi informasiya vasitələrinə, daha sonra da Ermənistandakı yüksəkçinli məmurlara zəng edərək "həşir salıblar": "Ertəsi gün bizi özünü "Dağlıq Qarabağın Xarici İşlər Nazirliyinin informasiya xidmətinin rəhbəri" kimi təqdim edən Marsel Petrosyanın yanına apardılar. O da dünya dövlətlərinin, hətta Rusiyanın belə Dağlıq Qarabağın dövlət müstəqilliyini tanımamasından gileyləndi və bizim də "yerli qanunvericiliyi kobud şəkildə pozduğumuzu" söylədi.    Biz də ona dedik ki, əgər Dağlıq Qarabağ özünü "dövlət" sayırsa, Rusiya vətəndaşları ilə və ümumiyyətlə, turistlərlə belə sarsaqcasına davranmamalıdır.    Dağlıq Qarabağda bizə işarə vurdular ki, yerli rejim Ağdama yollanmağımızdan hirslənib. Onlar bütün fotoşəkilləri yaddaşdan pozdular, amma bilmirlər ki, fləş-kartın yaddaşından pozulan məlumatı asanlıqla bərpa etmək olur. Dağlıq Qarabağda bizimlə rəftar aşkar göstərdi ki, Xankəndidəki rejim 1993-cü ilin iyun-iyul ayında Ağdamda baş vermiş faciələrin dünyaya xatırladılmasını istəmir. Ermənilərin gözəl və abad şəhəri yerlə bir etmələrini, başqasının ərazisini işğal etmələrini. Biz bəlkə də bütün bunları dünyaya xatırlatmazdıq - ermənilər vadar etməsəydilər". Ekspress